Unjárgga dálá sátnejođiheaddji ja Bargiidbellodaga sátnejođiheaddjeevttohas, Knut Store, lohká illudit otná eahkedii, go Unjárgga gielddaválgga bohtosat ilbmet.
Unjárgga dálá sátnejođiheaddji ja Bargiidbellodaga sátnejođiheaddjeevttohas, Knut Store, lohká illudit otná eahkedii, go Unjárgga gielddaválgga bohtosat ilbmet.
– Lean oalle lotkat, gealdagasas, muhto in fal balus. Šaddá gelddolaš oažžut bohtosiid, ja dál leat bargan iežamet barggu háhkat jienasteddjiid nu lea dušše vuorddašit otná eahkedii, lohká Knut Store. Son ávžžuha olbmuid geavahit jienastanvuoigatvuođa, iežas lohká moadde vahku dás ovdal jo jienastan.
Ovddidan ollu
Knut Store lohká alddis buori dovddu, ja lohká olihan ollu dán njealji jagis go leamašan fámus.
– Mii leat ovddidan ollu dán njealji jagis. Maŋemuš ášši lea čáhceprošeakta, mainna geahččalat oažžut ráinnas čáhci buohkaide. Miella lea ain joatkit ovddidit ášši, dadjá son.
Gáibidahtti
Son vásiha válggagičču leamašan eambbo gáibidahttin go eará jagiid, ja čujuha ahte dál leat leamašan eambbo cuiggodeamit.
– Ii leamašan nu go láve, dál eai leat čuvvon áššiid maid háliidit ovddidit, muhto geahččalit riidduid ráhkadit, muitala Knut Store.
Hástaleaddji
Unjárgga gielddas leat njeallje listtu, ja Knut Store oaivvilda Bargiidbellodaga hástaleaddji lea Sámeálbmot Bellodat (SáB) mas Bjarne Store-Jakobsen lea sátnejođiheaddjeevttohas.
– Sámeálbmot Bellodat lea min hástaleaddji, illudan oažžut bohtosiid, go lea dieđusge gelddolaš válga, dadjá Knut Store.
Ii čearggus
Bjarne Store-Jakobsen geavahii odne iežas jienastanvuoigatvuođa, ja muitala man dehálaš lea jienastit go de beassá leat mielde váikkuheames mii dáhpáhuvvá gielddas.
– In leat nu čearggus, rehkenasttán olbmuid áigá jo mearridan maid jienastit. Válggat mannet nu go mannet, munnje ii leat hirbmat stuorra gudni, muhto áinnas áiggošin šaddat ságadoallin. Dál gal lea vissis, lohká Bjarne Store-Jakobsen.
Rievdadit vuogádaga
Su áigumuš lea rievdadit Unjárgga gieldda vuogádaga ja ásahit fas lávdegottiid.
– Dáppe lea dál erenomáš vuogádat, gos ovdagoddi mearrida visot. Lávdegottit, nu go eará gielddain, eai gávdno dáppe, ja dan mun háliidan rievdadit, lohká Store-Jakobsen.
Revolušuvdna jus vuoitá
Bjarne Store-Jakobsen muitala stuorra revolušuvnna geavvat Unjárggas jus Sámeálbmot Bellodat vuoitá válgga.
– Ii leat goassege ovdal dáhpáhuvvan ahte SáB lea stuorámus bellodat. Mun hirpmástuvan jus oažžut eambbo jienaid go goassege ovdal, go min válgaapparáhtta ii leamašan nu stuoris dán jagi, lohká Bjarne Store-Jakobsen.
Váillaha eambbo listtuid
Unjárgalaš Magga Dahl ja Iver P. Smuk jienasteigga odne, ja sudno mielas lea erenomáš gelddolaš válga dán jagi ja illudeaba oažžut bohtosiid odne eahkes.
Iver P. Smuk dattetge ohcala eambbo válljenvejolašvuođaid ja oaivvilda Unjárggas leat beare unnán listtut.
– Livčče juollut eambbo válljenvejolašvuođa. Mun ohcalan eambbo doarjaga gielddas boazoealáhussii go lea sáhka eanangeavaheamis. Dál gal illudan oaidnit gii vuoitá válgga, lohká Smuk.
Gelddolaš válga
Magga Dahl lohká dehálažžan geavahit jienastanvuoigatvuođa, vai olmmoš lea mielde váikkuheames boahtte njealji jagis.
– Mun gal lean jienastan, ja lea gelddolaš válga dál dáppe, dadjá Dahl.
