Mannan vahkoloahpa juovlakonseartta oktavuođas mii dollui girkus sátnejođiheaddji jugii Unjárgga gieldda kulturbálkkašumi. Dan oaččui Kim-Erling Methi Johansen.
– Unjárgga álbmot leat duođaid beroštan kultuvrabálkkášupmejuohkimis dán jagi. Leat boahtán ollu buorit evttohusat, ja ávžžuhat olbmuid fas sáddet evttohusaid sisa boahtte háve. Gielddas lea hálddahuslaš kultuvralávdegoddi mii lea árvvoštallan bures buot evttohusaid, dajai sátnejođiheaddji Berit Ranveig Nilssen sártnistis.
Bálkkašupmi ii juhkkojuvvui 2014 rájes. Dál lea Unjárgga gielda fas ealáskahttán dan bálkkašumi ja dasa lassin lea ásahan sierra ossodaga mii muđui galgá bargat gieldda kultureallima ja sámegiela nannemiin.
– Primusmohtora
Unjárgga gieldda ássit galge evttohit olbmo gii sin mielas ánssáša oažžut gieldda kulturbálkkašumi. Olbmot leat sádden 19 evttohusa. Dán jagáš vuoiti lei evttohuvvon čieža árvalusas, ja dasa lassin su namma namuhuvvui guđa eará evttohusas.
– Lei hui čielggas gean olbmot háliidedje kulturbálkkašumi vuoitin 2023. Ja vuoiti ieš lea maiddái sádden sisa evttohusa. Árvalusain son čilgejuvvo buollisearran, jođihanfámolažžan, primusmohtoran ja stuorra resursan kultuvraeallimii ja kultuvrajuohkimii Unjárggas, muitala Nilssen kulturbálkkašumi vuoiti Kim-Erling Methi Johansen birra.
Resursa gildii
Johansen bargá Unjárgga kulturskuvllas ja Unjárgga kulturlávddis. Sus lea maiddái fitnodat man jođiha. Bargá olu kulturlágidemiid duogábealde.
– Mii doaivut ahte bálkkašupmi movttiidahttá su joatkit čuovga- ja jietnabargguin min gielddas ollu, ollu jagi vel. Dákkár guovddáš olmmoš dárbbašuvvo kultuvraeallimis ja Unjárggas leat kultuvrralaččat geafit su haga, loahpaha sátnejođiheaddji Berit Ranveig Nilssen.
