– Mii leat ilus go olaheimmet čovdosa soabaheami bokte. Buohccedivššárbargoheaitta gielddain, dan dilis mas riikka dál lea, livččii leamašan hirbmat duođalaš, lohká Tor Arne Gangsø KS:s.
Measta vihtta diimmu maŋŋel mearriduvvon áiggi de beasai riikasoabaheaddji Mats Ruland almmuhit ahte KS ja Norgga buohccidivššársearvvi soabaheapmi lea čovdojuvvon.
Nu ii gártta bargoheaitta buohccidivššáriin.
– Mii leat ilus go garvit bargoheaitaga gielddasektora buohccedivššáriid gaskkas. Dat dilli mii Norggas ja gielddain lea dál ja šaddá giđa mielde, de dárbbašat mii buot buriid návccaid ja čeahpes buohccidivššáriid, dadjá KS bargoeallindirektevra ja šiehtadallanjođiheaddji Tor Arne Gangsø preassadieđáhusas.
Soabahanboađus mielddisbuktá ahte Norgga buohccidivššársearvi beassá dan seamma váldotariffašiehtadussii mii guoská muđuige gielddasektorii, mas obbalaš rámma lea 1,7 proseantta. Dasa lassin leat bealit ovttaoaivilis hutkat iešguđetlágan doaibmabijuid maiguin buorebut nákcejit oččodit eambbo buohccidivššáriid bargguide.
