SAS heaittiha streaikka. Norgga Girdiidsearvi ja Parat leat boahtán ovttaoaivilii tariffašiehtadusa birra.
SAS heaittiha streaikka. Norgga Girdiidsearvi ja Parat leat boahtán ovttaoaivilii tariffašiehtadusa birra.
– Mii leat olahan iežamet deháleamos gáibádusaid. Dat dagaha ahte sáhttit evttohit šiehtadusa min miellahtuide, lohkába šiehtadanjođiheaddjit Jens Lippestad ja Jan Levi Skogvang. Soai ovddasteaba Norgga Girdiidsearvvi ja Parat.
Deháleamos oasit šiehtadusas leat ahte olles ja fásta virggit sihkarastojuvvet, ahte galget beassat luomu váldit go skuvllain lea luopmu ja ahte bálká galgá lassánit guđain proseanttain golmma jagi badjel. Dan dieđiha Parat bargiidorganisašuvdna preassadieđáhusas.
– Sullii seamma
– Loahpalaš šiehtadus lea sullii seamma maid fálaimet SAS:ii šiehtadallamiin vahkkoloahpas. Dan fálaldagas leimmet vel dahkan olu vai ii šatta streaika. Eahpesihkarvuohta mii lea čuožžilan maŋemuš beivviid lei áibbas dárbbašmeahttun, lohká Lippestad.
Skogvang lohká ahte stuorámus hástalus šiehtadallamiin ledje NHO-direktevrra Torbjørn Lothe ja konsearnahoavdda Gustavsson cealkámušat.
– Dat maid dál leat ožžon lea seamma maid eará Skandinavia riikkain ožžot. Lea dat seamma maid leimmet sihtan ovdal go manaimet goabbat sadjái. Dat čájeha ahte dán guovtto čuoččuhusat eai leat leamaš deaivilat, lohká Skogvang.
Álkit šiehtadallamat
SAS-pilohtaid jođiheaddji Paratas, lohká ahte šiehtadallamat šadde álkibut go ledje golbma beaivvi streiken.
– Vaikko eai lean vuos nu máŋggas streaikkas, de álge šiehtadallamat mannat buoret guvlui gaskavahkku. Min mielas lea buorre go ovttas leat gávnnahan čovdosa vai streaika ii joatkašuvvon, lohká Skogvang.
