Ealáhusministtar Jan Christian Vestre (Bb) lea bivdojuvvon dohkkehit ahte oasit Norgga miljárdagáibádusas SAS vuostá rievdaduvvojit ođđa ossosiin girdifitnodagas.
SAS lea velggolaš Norgii badjelaš 1,6 miljárdda ruvnno oktan reanttuiguin maid eai leat máksán.
Girdifitnodat dieđihii gieskat ahte Norga oažžu ruovttoluotta eanemusat 150 miljovnna ruvnno miljárdagáibádusas dán jagi. Jus buot manná bures, de sáhttá Norga oažžut vel 250 miljovnna ruvnno moatti jagi geahčen.
SAS lea dieđihan ahte Norga ferte dohkkehit ahte oažžu seaguhusa ruđain ja ossosiin dán jagi. Norgga eiseválddit galget jienastit dohkkehit go SAS evttohusa guovvamánus, čállá E24/Aftenposten. Bargojoavku mii lea ásahuvvon áimmahuššat earret eará Norgga beroštumiid, ávžžuha Norgga miehtat dasa.
Aviissaid dieđuid mielde ii oro Vestre áigume vuosttaldit dien ráđi. Danne orru šaddamin nu ahte Norga fas šaddá SAS oasusdoallin.
Norga lei mielde SAS oasusdoallin álggu rájes 1946:s, muhto vuvddii ollásit eret ossosiid girdifitnodagas 2018:s.
Juovlamánus 2020 oaččui SAS 1,5 miljárdda sturrosaš loana Norggas. Dát lea oassi das maid girdifitnodat dál galgá máksit ruovttoluotta. (©NTB)
