Sihke Kárášjoga ja Guovdageainnu sámi joatkkaskuvllas leat mealgat unnit ohcamat go lea sadji, čájehit Finnmárkku fylkkagieldda gaskaboddosaš sisaváldinlogut.
Sihke Kárášjoga ja Guovdageainnu sámi joatkkaskuvllas leat mealgat unnit ohcamat go lea sadji, čájehit Finnmárkku fylkkagieldda gaskaboddosaš sisaváldinlogut.
Finnmárkku fylkkagielda lea dál almmuhan gaskaboddosaš sisaváldinloguid Finnmárkku joatkkaskuvllaide ja oahpahussajiide. Dál álgovuorus lea dušše Finnmárkku nuoraid ohcan registrerejuvvon, olggobealde ohcamat leat vel báhcán, ja dan dihte leat logut gaskaboddosaččat.
Logut čájehit ahte oktiibuot 3 383 olbmo leat ohcan joatkkaskuvllaide, ja 2 922:s lea nuoraidriekti. Lea sullii 50 ohcama unnit go diibmá, muhto dasa lassin bohtet moadde eambbo registreremat dás ovddas guvlui, čállá Finnmárkku fylkkagielda preassadieđáhusastis.
Lagabui 80 guorossaji
Kárášjogas Sámi joatkkaskuvlla gaskaboddosaš loguin leat 106 oahppi ohcan skuvlii, muhto skuvllas lea sadji 182 oahppái. Bivnnuheamos suorgi Kárášjogas lea huksen- ja rusttetteknihkka mas leat guokte eambo ohcci go lea sadji. Guovdageainnu joatkka- ja boazodoalloskuvllas lea gaskaboddosaš lohku 91, muhto lea sadji 172 oahppái. Bivnnuheamos suorgi Guovdageainnus lea luonddugeavaheapmi mas leat 12 saji ja 13:s leat ohcan dasa.
Deanu joatkkaskuvlla gaskaboddosaš sisaváldinlohku lea 40, skuvllas leat 60 saji.
Ii heađástuva
Sámi joatkka- ja boazodoalloskuvlla vuosttašinspektevra Lisbeth Gran ii heađástuva ja deattuha ahte leat dušše gaskaboddosaš sisaváldinlogut.
– Eai leat unnit ohccit go diibmá seamma áiggis. Lea veaháš árrat hupmat loguid birra, go eai leat váldon mielde sii geat bohtet olggobealde Finnmárkku. Nu doaivumis rievdá min skuvlalohku, Lisbeth Gran.
Márkanfievrridan skuvla
Lisbeth Gran muitala iežaset bures márkanfievrridan skuvlla ja geavahan ollu resurssaid bargui.
– Mu mielas leat buori barggu dahkan márkanfievrridit skuvlla. Dá leat vuosttaš sisaváldinlogut, ja lea ain guhká dassá go loahpalaš ohcanlogut čilget. Sáhttá ain ollu rievdat, dadjá Gran.
Ii plánen heahtedoaimmaid
Son ii loga plánen makkárge heahtedoaimmaid bidjat johtui, vaikko ain leat ollu guoros sajit skuvllas.
– Easka mánu geahčen diehtit eambbo, go dalle leat olggobeale ohppiid ohcamat maid mielde. Dá lei vuosttaš sisaváldin, deattuha son.
Vuođđoskuvllas unnán oahppit
Maŋemuš jagiid lea vuođđoskuvlla ohppiidlohku njiedjan, ja Lisbeth Gran muitala guoktelogi jagi dás ovdal ledje 60 oahppi mat gerge vuođđoskuvllas Guovdageainnus, maŋemuš jagiid leamašan gaskal 26-27 oahppi.
– Jáhkán vuođđoskuvllaid ohppiidlogus lea maid dadjamuš go ohcanlohku lea niedjan. Sávan eambbo mánáid riegádit boahttevaš jagiid, čaimmiha son.
Ii vel almmuhan
Sámi joatkka- ja boazodoalloskuvlla vuosttašinspektevra ii loga háliidit almmuhit makkár suorggi sáhttá fertet heaittihit jus eai leat doarvái ohccit.
– Easka njukčamánus oaidnit mo dillii lea, lohká son.
Eambbo ohccit go sajit
Leavnnja joatkkaskuvllas leat eambbo ohccit go sajit. Gaskaboddosaš sisaváldinlogut čájehit ahte 210:s leat ohcan, muhto skuvllas leat beare 205 saji.
– Mu mielas ledje positiiva ohcanlogut, ja lea nu go leimmet vuordán. Lea hui somá go nu ollugat válljejit min skuvla, lohká Leavnnja joatkkaskuvlla duđavaš rektor Sylvi Josefine Johnsen.
Son lasiha ahte navdá sivvan dasa go skuvllas lea buorre beaggin. Johnsen muitala iežaset vuoruhit ahte juohke eaŋkal oahppis galgá leat buorre sosiála biras.
– Loaktin lea juoidá maid leat vuoruhan, loahpaha duđavaš rektor.
