Guovdageainnu nuoraidfitnodat galgá Romssas gilvalit ja muitalit iežaset fitnodatjurdaga birra.
Oktiibuot 350 joatkkaskuvlaoahppi čoahkkanit Romsii boahtte vahkku gos 74 nuoraidfitnodaga galget gilvalit 17 kategoriijas.
Okta dain fitnodagain lea Sámi joatkkaskuvlla ja boazodoalloskuvlla nuoraidfitnodat Gollegiella UB.
Gollegiella UB fitnodat lea hábmen buseriid ja báiddiid main lea sámi design ja teaksta. Daid biktasiid bokte háliidit sii oainnusmahttit ja gudnejahttit sámi giela ja kulturárbbi.
– Gollegiella UB háliida muittuhit sihke midjiide alcceseamet ja boahttevaš buolvvaide man dehálaš lea suddjet giela ja nannet min sámi identitehta. Min biktasat galget veahkehit loktet sámevuođa ja čájehit vuostehágu hárdimii ja vealaheapmái maid ollu sápmelaččat vásihit dál, čállá fitnodat iežaset fitnodatjurdagis.
Sáhttet beassat vel viidáseappot
Nuoraidfitnodagat leat áŋgirit bargan iežaset gávpejurdagiiguin olles skuvlajagi ja fylkkameašttirgilvvuin Romssas galget oahppit čájehit maid leat oahppan.
Fitnodagat gilvalit iešguđetlágan kategoriijas, earret eará ceavzilvuođas, márkanfievrrideamis, rehketdoalus ja «Buoremus nuoraidfitnodat» kategoriijas. Buoremus fitnodagat besset viidáseappot nuoraidfitnodagaid Norggameašttirgilvvuide mat lágiduvvojit miessemánus ja gos fitnodat ovddasta iežas ruovttufylkka.
