Finnmárkku Ruovttusuodjalusguovlu 17 (HV-17) lea hilgon muhtin Finnmárkku Ruovttusuodjalusguovllu 17 (HV-17) soalddáhiid ráhkaduvvon giehtamearkka mii čájeha sámi leavgga ruoná ivnniiguin. Soalddáhat háliidit dál loktet ášši alit dássái.
HV-17 várrekorporála ja kompaniijaadjutánta Emma Nikodemussen muitala ahte son lea rámis go barget Suodjalusas ja go beassá Norgga suodjalit jus lea dárbu, muhto su mielas guoská dát maid dasa ahte suodjalit Sámi. Nikodemussen leamaš mielde ráhkadeamen mearkka mii gohčoduvvo «flaggpatchen» dahje «leavgamearka» sámegillii.
– Sis-Finnmárkkus leat measta dušše sámegielat olbmot, erenoamážit HV-17:s, ja olu min guovlluhárjehallan lea danin sámegillii, muitala Nikodemussen Forsvarets Forum áigečállagii.
Su mielas galggašii sámevuohta leat eambbo oidnosis Suodjalusas. Dát giehtamearka lea ráhkaduvvon ruoná ivnnis mii heive Suodjalusa biktasii ja nubbi mearka lea ráhkaduvvon Sámi leavgga ivnniiguin.
Son lohká leat lea dábálažžan ahte soalddáhat ieža ráhkadit dakkár mearkkaid, muhto eai buohkat leat dasa nu mielas. Bláđđái muitala son ahte bealli sin Sis-Finnmárkku HV-guovllus sihkkarit leat darvvihan iežaset biktasiidda dakkáriid. Nikodemussen ii leat vuollánan ja áigu ođđasit fas ohcat.
2023 njukčamánus sáddii ohcamuša dan giehtamearkka geavahit HV-17 bargoveaga seršántahovdii, muhto seršántahoavda hilggui ohcamuša dainna ákkain ahte ii sáhte geavahit iešráhkaduvvon leavggaid ja mearkkaid.
Suodjalushoavdda heraldalaš (galbba ja meahki historjá) ráđđeaddi Claus Andreas Østby ádde manin olusat háliidit geavahit dan mearkka, muhto ferte muitit ahte Sámi leavga geavahuvvo Norggas, Ruoŧas, Suomas ja Ruoššas. Østby deattuha ahte uniforbma oktan Norgga leavggain geavahuvvo beroškeahttá álbmotjoavkkus dahje duogážis ja gullevašvuođas ja dasa čatnasit vuoigatvuođat ja suodjalus Norgga ja riikkaidgaskasaš lágaid ektui.
