Juohke čavčča árvvoštallojuvvojit iešguđet várreguovlluid rievssatmáddodagat vai lea vuođđu hálddašit smávvafuođđo bivddu.
Oppalaččat orro leamen nu ahte rievssatmáddodagat Lulli-Norggas leat unnon. Ollu várreguovlluin lei maŋŋit giđđa ja geasset ledje olu njuoska dálkkit. Dát lea várra oassi čilgehusas rievssatmáddodagaid hedjoneapmái, muhto rievssahiid birgejupmái váikkuhit maid eará áššit, ovdamearka dihtii gazzalottit ja riebanat.
– Midjiide geat bivdit rievssahiid lea dehálaš ahte min bivdu ii galgga noađuhit rievssatmáddodaga dárbbašmeahttumit, ja danne eat áiggo bivdit eambbo go dan maid dán jagi buvttadeapmi addá, dadjá diehtojuohkinhoavda Espen Farstad Norgga bivdo- ja guolástansearvvis.
Son dadjá ahte lea buorre diehtit iešguđetge várreguovlluid rievssatmáddodagaid árvvoštallamiid mielde ahte sis lea buorre máhttovuođđu mearridit bivdoeriid, ja vejolaččat biehttalit bivdimis rievssahiid hearkkimus guovlluin.
