Beaivváš Sámi Našunálateáhter ovddeš hoavda Harriet Nordlund lea jápmán. Son šattai 68 jagi boaris.
Sámi neavttár, rešissevra ja teáhterhoavda Harriet Nordlund lea jápmán.
– Ovddeš teáhterhoavda Harriet Nordlund lea eretvádjolan, son šattai 68 jagi boaris. Harriet lei hoavdan Beaivvážis ovtta teáhterhoavddaáigodaga, 1.1.2003–31.12.2006. Son ollii bagadit logi čájálmasa Beaivvážis, guhtta čájálmasa dan botta go lei hoavdan, ja guokte čájálmasa ovdal ja guokte čájálmasa maŋŋel. Sus lei maŋimuš bagadanbargu Beaivvážis 2016:s, dalle son bagadii «Gába» čájálmasa, čállá Beaivváš Sámi Našunálateáhter neahttasiiddustis.
Harriet Nordlund riegádii čakčamánu 20. beaivvi 1954:s. Son lei eret Johkamohkis, Ruoŧa beale Sámis. Wikipedia dieđuid mielde jođihii Nordlund máilmmi vuosttaš sámi teáhtera, Dálvadis, 1971 rájes 1985 rádjai.
