Sámedikki ja Davvi Dearvvašvuođa oktasaš stivrenjoavku lei mannan vahkkus Kárášjogas hábmemin strategalaš ovdánahttin spesialistadearvvašvuođabálvalusaplána sámi álbmogii.
Sámedikki ja Davvi Dearvvašvuođa oktasaš stivrenjoavku lei mannan vahkkus Kárášjogas hábmemin strategalaš ovdánahttin spesialistadearvvašvuođabálvalusaplána sámi álbmogii.
Justa jagi dás ovdalis vuolláičálle Norgga beale Sámediggi ja Davvi Dearvvašvuohta ovttasbargošiehtadusa man ulbmil lea addit sámi buhcciide ovttaárvosaš dearvvašvuođa- ja fuolahusbálvalusa go Norgga álbmot muđui oažžu.
Dat eaktuda ahte dearvvašvuođabálvalusat heivehuvvojit sámi buhcciid gielalaš ja kultuvrralaš duogážii.
Dan barggu oktavuođas čoahkkinaste Sámediggi ja Davvi Dearvvasvuođa stivrenjoavkku.
Strategiijaplána hábmemin
Davvi Dearvvašvuođa fágadirektevra Geir Tollåli, gii jođiha strategiijajoavkku 12 olbmo sturrosaš stivrenjoavkku, muitala sii leat ožžon bargun heivehit ja ovdánahttit spesialistadearvvašvuođabálvalusa buot sápmelaččaide Norggas.
Muitala sis leat bargojoavkkut mat barget guđa iešguđet áššiin mat gusket sámi álbmoga fálaldahkii.
– Mii leat dál ráhkadeamen strategiijaplána mii gárvána jagi loahpas. Dehálamos lea giella- ja kulturáddejupmi ja ahte buorit bálvalusat leat olámuttos. Dál leat mii dan geahčadeamen. Mo sáhttit mii dan organiseret ja mo galgat ovdánahttit SÁNAG jurdaga. Mo sáhttit mii fállat seammaárvosaš fálaldaga máttasápmelaččaide go julev- ja davvisápmelaččaide, čilge Davvi Dearvvašvuođa fágadirektevra Geir Tollåli.
Muitala sii čilgejedje Dearvvašvuođa- ja fuolahusdepartementii, mii finai Sámedikkis mannan gaskavahkku, makkár hástalusaid sápmelaš buohcci vásiha spesialistadearvvašvuođabálvalusas.
Seammaárvosaš fálaldaga buohkaide
Tollåli deattuha ahte olbmot galget oažžut bálvalusfálaldaga gos sii ásset ja ahte sámi buohcci oažžu tiimmu dan doaktára luhtte geas lea dat gelbbolašvuohta.
– Mii háliidat ahte dearvvašvuođabálvalus oažžu giella- ja/dahje kulturgelbbolašvuođa vuođđooahpu rájes gitta spesialistaohppui. Dan galget iešguđet dearvvašvuođaásahusat fuolahit ja mii digaštallat dál mo mii galgat dan čoavdit, ovdamearkka dihtii mo juohkit SÁNAG gelbbolašvuođa viidásat. Lea stuorra bargu, lohká Davvi Dearvvašvuođa fágadirektevra Geir Tollåli.
Guorahallamin mo ávkkástallat čehppodaga
Sámedikki ráđđelahttu Mikkel Eskil Mikkelsen muitala sii barget vuđolaččat vai Sámediggi oažžu buori strategiijadokumeantta mas iešguđet bealit leat bures guorahallojuvvon.
– Mis leat olu čeahpes fágaolbmot ja mii háliidat sin gelbbolašvuođa geavahit sámi buhcciide ávkin. Justa dál leat mii Sámedikkis dadjan ahte vuoruhat mánáid ja nuoraid fálaldaga, maiddái boares olbmuid fálaldaga. Mii leat geahččamin makkár fálaldaga sii ožžot ja makkár čuovvuleami gielddat fállet sidjiide. Mii leat geahččamin mo SÁNAG (sámi álbmoga nationála spesialistadearvvašvuođabálvalus) doaibmá ja mo sáhtášii dan buorebut ávkkástallat, čilge Sámedikki ráđđelahttu Mikkel Eskil Mikkelsen, muhto deattuha son ii hálit dás muitalit mii sin mielas lea dehálamos.
Váilot dieđut
– Stuorámus váilivuohta lea ahte sámi buohcci ii oaččo dan fálaldaga man son galggašii oažžut, lohká Sámedikki ráđđelahttu Mikkelsen.
Čilge ahte dál váilu diehtu makkár fálaldagaid sámi buohcci duođaid oažžu, muhto sii dihtet gal olbmuid bokte ahte buohccit eai oaččo dan fálaldaga.
Mikkelsen lohká dearvvašvuođavuogádagas leat stuorra hástalusat, nu go mo galgá fuomášit ahte buohccis lea sámi giella- dahje kulturgullevašvuohta.
– Dien oasi fertet mii buoridit. Dearvvašvuođabargiin ja tulkkas lea geatnegasvuohta fuolahit ahte buohcci lea ádden dan dieđu man lea ožžon, lohká Mikkelsen.
Dearvvašvuođa- fuolahusdepartemeanta guossis
Mikkelsen muitala Dearvvašvuođa- ja fuolahusdepartemeanta lea bargagoahtán nationála dearvvašvuođa- ja buohcciviesuplánain.
– Dasa ráhkadit sii plána mas leat boahtteáiggi dehálamos vuoruhansuorggit. Earret eará mo buoridit gielddaid ja buohcciviesuid gulahallama ja buhcciid čuovvoleami buoremusat. Dainna áššiin leat Davvi Dearvvašvuohta ja Sámediggi bargamin, lohká sámediggeáirras Mikkelsen.
