Ođđajagemánus dušše guokte olbmo Norgga johtolagas. Trygg Trafikk ávžžuha olbmuid johtit várrogasat dálvesiivvus.
Guokte dievddu duššaiga Norgga johtolagas ođđajagemánus. Jápminlogut leat njiedjan diimmá ektui, go dalle jápme guhtta olbmo seamma mánus. 2010 rájes leat ođđajagemánu rájes gaskamearálaččat jápmán badjel 10 olbmo.
– Vaikke jápminlogut leat njiedjan dán jagi, de leat ain máŋga oapmahačča báhcán morrašii. Mii fertet joatkit jápminlihkohisvuođaid eastademiin maiddái 2022:s, lohká Trygg Trafikk seniorráđđeaddi Bård Morten Johansen preassadieđáhusas.
Dálvesiidu
Olu guovlluin lea ain dálvesiivu ja báikkuid lea olu borgan ja temperatuvrrat rievddadit. Trygg Trafikk rávve olbmuid vuodjit várrogasat ja siivvožit eastadan dihte lihkohisvuođaid.
– Geaidnu sáhttá gálja vaikke lea bievllus dahje jus lea borgan. Berre vuodjit siivvožit ja leat erenomáš várrogas mohkiin. Lea maid dehálaš ahte biilavuoddjit dollet buori gaskka eará biillaide, sihkkelastiide ja vázziide. Galgá maid faskut lásiid ja čuovggaid vai oaidná bures. Jus lea vácci jođus, de lea hirbmat dehálaš geavahit šleđggona, lohká Johansen.
