Nu mo diibmá ja ovddit jagiid, de lágida Ávvir dán geasi fas oaggungilvvu «Guollelihkku» mánáide ja nuoraide. Govves iežat guoli ja sádde dieđuid midjiide!
Dál lea geassi fas dás, ja nu lea ge áigi álggahit Ávvira oaggungilvvu. Gilvu lágiduvvo juohke vahkku miehtá geasi, ja das lea vejolaš vuoitit buriid vuoittuid. Vuollelis gávnnat eambbo dieđuid gilvvu birra.
Ávvira sadjásaš neahttadoaimmaheaddji, Roy Arthur Olsen, sávvá oallugiid searvat gilvui, ja illuda oaidnit govaid ja lohkat fearániid.
– Lea hui somás gilvu mii láve bivnnut min nuoramus lohkkiid gaskkas. Mii sávvat dán geasi ge beassat oaidnit ollu oaggungovaid ja lohkat somás oaggunfearániid. Searvat oažžu vaikko guđiin guliin, leažžá dal mearas, jávrris vai jogas goddán dan. Eaktu lea ahte 2023 geasi lea goddán guoli, dadjá Olsen.
Ávvira geassebargi lágida oaggungilvvu
Dán geasi lágida geassebargi Sara Elise Eira oaggungilvvu, ja son ávžžuha mánáid ja nuoraid searvat gilvui. Son muitala ahte juohke vahkku vuorbáduvvo vuoiti, ja dasa lassin ožžot vel buohkat geat servet unna skeaŋkkaža.
– Buohkat geat servet gilvui leat mielde vuorbádeamis oaggunstávrrás, beroškeahttá makkár guolli lea dahje gos dat lea goddon. Mii sáddet maiddái juohke oasseváldái somás skeaŋkkaža poastta mielde, nu ahte dat gánnáha searvat! Dál ii leat go ohcalit oaggunstávrrá ja bálkestit vuokka čáhcái! lohká geassebargi Sara Elise Eira, gii illuda lágidit oaggungilvvu.
Dán jagáš gilvu álgá mánnodaga, suoidnemánu 3. beaivvi 2023, ja bistá gitta sotnabeaivái, borgemánu 13. beaivái, diibmu 24.00 rádjái.
Ná searvvat «Guollelihkku» oaggungilvui!
Ávvira jahkásaš oaggungilvui sáhttet vuollel 18-jahkásaš mánát ja nuorat searvat. Govat almmuhuvvojit avvir.no siiddus ja Ávvira báberaviissas.
Deaddil dákko, searvva ja deavdde buot dieđuid!
Gilvvu njuolggadusat:
Gilvu álgá mánnodaga, suoidnemánu 3. beaivvi 2023, ja bistá gitta borgemánu 13. beaivái diibmu 24.00 rádjái.
Gilvui sáhttá searvat vaikko guđiin guliin, beare lea goddon oaggunstávrráin.
Guolli oažžu leat goddon vaikko gos, muhto ferte leat goddon 2023 geasi.
Juohke vahkku vuorbádit ovtta oasseváldi guhte dan vahkku lea dieđihan guoli, ja son vuoitá oaggunstákku. Sus lea dan vahkku «Guollelihkku».
Buohkat geat sáddejit guollegova ožžot skeaŋkkaža Ávviris. Muitte čállit iežat poastačujuhusa.
Loahpas geasi leat maid buohkat geat oassálastet mielde vuorbádeamis mas sáhttá vuoitit 1500 ruvnno árvosaš skeaŋkakoartta.
