Gonagas Harald lea buohccindieđihuvvon maŋŋel go sus lea duođaštuvvon koronavirus.
– Majestehta Gonagas Haraldii (86) lea njommon korona, ja son lea buohccindieđihuvvon dassážii go dávdamearkkat nohket. Gonagasas lea nuorvu dávdamearkan ja bissu ruovttus, čállá Gonagasviessu ruovttusiiddus.
Stáhtaministtar Jonas Gahr Støre (Bb) čállá dieđus NTB ođasdoaimmahahkii ahte sávvá gonagasa dearvvasmuvvat farggamusat.
– Mun sávan ahte gonagas dearvvasmuvvá jođánit.
Ruvdnoprinsa Haakon váldá badjelasas gonagasa vuođđolágalaš bargguid dassážii go gonagas dearvvasmuvvá, dieđiha Gonagaslaš hoava veahkkegulahallanhoavda Sven Gjeruldsen VG aviisii.
Nuppes njommon
Gonagas Haraldis lei koronavirus maiddái diibmá. Dalle duođaštuvvui sus koronavirus njukčamánu 22. beaivvi. Sus eai lean dalle ge duođalaš dávdamearkkat, ja lei buohccindieđihuvvon badjelaš vahkku.
2021 skápma leigga sihke gonagas ja dronnet boahkuhuvvon golbmii. NTB ii leat ožžon dieđuid mat muitalivččii lea go gonagasbárra ožžon eanet koronaboahkuid dan rájes. Soai leaba vuoruhuvvon iežaska rollaid geažil ja danin go gullaba riskajovkui agiska geažil.
Gonagas Harald lei maiddái buohccindieđihuvvon borgemánus nurvo geažil, ja miessemánus ges infekšuvnna geažil. Dalle lei maid gártan buohcceviesu dikšui.
(©NTB)
