-Almmuhus-
-Almmuhus-
OĐĐASAT Golmma beaivve geahčen fertet vástidit válddát go skuvla­saji

Golmma beaivve geahčen fertet vástidit válddát go skuvla­saji

-

-

Badjel 8200 ohcci leat dál ožžon skuvlasaji fálaldaga joatkkaskuvllaide Romssas ja Finnmárkkus.

– Sii geat leat vuosttašsisaváldimis leat ožžon fálaldaga, leat ožžon SMS bokte dieđu iskat ja vástidit skuvlasaji fálaldahkii. Vástádus ferte sáddejuvvot maŋemustá bearjadaga suoidnemánu 17. beaivvi, čállet Romssa ja Finnmárkku fylkkasuohkanis preassadieđáhusas. 

Vuosttašsisaváldin lea várrejuvvon sidjiide geain lea nuoraidriekti, mii mearkkaša sii geat eai leat golbma jagi vázzán joatkkaskuvlla ovdal. Eará ohccit, geain lea rávisolbmoriekti, ollašuhttin riekti dahje ii-riekti, leat mielde nuppisisaváldimis. Nubbisisaváldin dahkko vahkku 30:s. Dalle sáddejuvvo ođđa diehtu SMS bokte iskat ja vástidit fálaldaga.

178 oahppi ožžon fálaldaga stádalaš sámi joatkkaskuvllaide

Oktiibuot lea 89% nuoraidriekteohcciin ožžon vuosttašsávaldat skuvlasajifálaldaga. Dát proseantalohku láve lassánit maŋŋel go nubbi sisaváldin lea gárvvis. Fidnofágaide leat 81 % ožžon vuosttašsávaldaga, ja lohkanráhkkanahtti fágaide leat 95 % ožžon vuosttašfálaldaga. 178 oahppi olles riikkas leat ožžon skuvlasaji fálaldaga stádalaš sámi joatkkaskuvllaide. 

– Deháleamos dál lea vástidit fálaldahkii, lohká oahppofylkkaráđđi Bjarne Rohde.

Muhtin nuoraidriekteohccit eai leat vel ožžon fálaldaga vuosttašsisaváldima maŋŋel, muhto Romssa ja Finnmárkku fylkkasuohkan dáhkida ahte buohkat ožžot fálaldaga ovdal go skuvllat álget.

-Almmuhus-