Gollešakála ii adno amas elliidšládjan Norggas, ja dan ii leat lohpi jávkadit jus ii leat ožžon lobi biraseiseválddiin.
– Gollešakála lea boahtán Norgii lunddolaččat, ii ge dat dárbbaš leat ealli mii ii gula Norgga lundui. Boahttevaš jagiid šaddá guovddáš fáddán movt galgá meannudit go luondu rievdá ja makkár váikkuhusat das leat, dadjá Birasdirektoráhta ossodatdirektevra Ivar Myklebust iežaset neahttasiiddus.
Oidnon fuođđokámeras
Maŋemus vahkuid lea ollu leamaš sáhka gollešakála birra mii lea fuomášuvvon Norggas.
Govain mat ledje govvejuvvon 2019:s ja 2020:s duođaštedje diibmá ahte gollešakála lea sihke Leavnnjas ja Gáivuona suohkanis, ja báikkálaš dieđuid mielde gávdno dat ealli ain goappaš guovlluin. Gollešakála lea dál leavvan viidábut olbmuid gáržžideami haga. Nu go eará ge šlájat, de lea jáhkehahtti dat sajáiduvvá ođđa guovlluide.
– Luondu ferte beassat rievdat lunddolaš proseassaid mielde ja rievdat dálkkádatrievdamiid mielde. Mii eat berre aktiivvalaččat bissehit elliidšlájaid lávdama, dadjá Myklebust.
Ii leat sávakeahtes šládja
Direktoráhtta čállá ahte šlájaid lávdan lea oassi luonddus, ja dálkkádatrievdamat rievdadit luonddu vel jođáneappot.
– Danne jáhkket ihtit eambbo ođđa šlájaid Norgga mehciide dás ovddosguvlui. Eai buot ođđa elliidšlájat, mat ieža lávdet Norgii, leat sávakeahtes šlájat. Dasa ferte duođalaš árvvoštallan adnot vuođđun. Muhto muhtin šattut ja eallit gal leat definerejuvvon amas šládjan Norggas, ja dat mearkkaša ahte leat buktojuvvon dahje čuovuhuvvon Norgii, ja eai leat ieža lávdan deike. Ovdamearkkat dasa leat meahccespiidni ja amerihkámiŋka, čállet sii.
