Birasdirektoráhtta árvala gieldit buot huksemiid jekkiide, mii lea birrasiid ovcci proseantta Norggas.
– Dát lea vuoitu sihke dálkkádahkii ja lundui. Mii árvalit gildosa jekkiid unnideami vuostá vai eai luovvanivčče dálkkádatgásat mat leat leamaš vurkejuvvon duhahiid jagiid. Dat sihkkarastá boahtteáiggi karbonadoalaheami, ja seammás besset badjel 600 rukseslisttu šlája orrut ruovttuineaset, dadjá Birasdirektoráhta direktevra Ellen Hambro preassadieđáhusas.
Dušše áibbas dárbbašlaš doaimmaide
Evttohus lea boađus das go Birasdirektoráhta bivddii Dálkkádat- ja birasdepartemeantta hábmet evttohusa movt gieldit jekkiide hukset. Dát bargu čuovvola Stuoradikki ávžžuhusmearrádusa 2023 stáhtabušeahta meannudeami oktavuođas.
Dát gielddus guoskkašii buot jekkiide Norggas, beroškeahttá čikŋodagas dahje das man badjin jeaggi lea eanadagas. Norggas gokčet jeakkit oktiibuot measta 30 000 km², mii lea sullii 9 proseantta Norgga areálas.
– Mii evttohit ahte sáhttá jekkiide addit huksenlobi dušše jus doaibma lea áibbas dárbbašlaš servodatberoštumiid dihte, nu go infrastruktuvrra huksemis, dahje eará erenoamáš áššiin main lea sáhka guvllolaš dahje báikkálaš infrastruktuvrras. Gielddus ii hehtteše dárbbašlaš divodemiid, dadjá birasdirektevra Hambro.
Njealjádas oassi váldon barttaide
NINA almmuhii dán čavčča raportta mas čájeha ahte suohkanat leat várren 164 km² jeaggeeatnama huksemiidda. Dat dagaha ahte ollislaš dálkkádatgássaluoitin Norggas šaddá gaskal 19 ja 55 miljon tonna CO2-ekvivalentta, rievddada dan mielde man čiekŋalat jeakkit leat. Buohtastahttima dihte lei dát 48,9 miljon tonna 2022:s.
Huksendoaimmaide gullet visttiid, geainnuid ja eará rusttegiid huksen. Stuorámus váikkuhusa jekkiide dahká ássanvisttiid huksen, masa gullet barta, ásodatvisttiid, ealáhusvisttiid jna. huksen. Dušše bartahuksen lea obbalaččat váldán 25 % jekkiin, čállá direktoráhtta.
