Sámiid vuosttaš riikačoahkkin lágiduvvui Troandimis 1917:s, ja 100 jagi maŋŋel šaddá stuora ávvudeapmi golmma beaivvi badjel seamma gávpogis.
Sámiid vuosttaš riikačoahkkin lágiduvvui Troandimis 1917:s, ja 100 jagi maŋŋel šaddá stuora ávvudeapmi golmma beaivvi badjel seamma gávpogis.
– Lea jo áibbas čielggas ahte Troandin ferte leat verddegávpot daidda ávvudemiide. Dáppe álggii buot. Lea juoga erenoamáš Troandimiin midjiide, muitala sámediggepresideanta Aili Keskitalo, gii lei mielde almmuheame plánaid Troandima ráđđeviesus mánnodaga.
Gávpešillju šaddá doaluid guovddážin
Leat sámediggi, Lulli-Trøndelága fylkkasuohkan, Davvi-Trøndelága fylkkasuohkan ja Troandima suohkan mat leat ovttasbargan lágidit ávvudoaluid mat leat dehálaččat sámiid historjjás. Doalut leat ožžon nama Tråante 2017. Troandima gávpešillju galgá leat guovddáš báikin ávvudeamis. Ovttasbargoguoimmit illudit leat guossoheaddjin guovvamánus boahtte jagi.
Mihttu lea čájehit ja ovdanbuktit dieđuid sámiid birra, sámi kultuvrra ja historjjá maŋemus 100 jagi.
– Vaikko mii Norggas leat ollen guhkás eamiálbmogiid gieđahallamiin, de leat mii aŋkke hui čihkosis stuoraservvodagas. Min gielat leat rašes dilis ja mis lea ain luodda guorrat almmolaš bálvalusaid ektui. Ii leat sihkar ahte mu eadni beassá hupmat iežas giela go fitná doaktára ságain, muitala sámediggepresideanta.
Stádaministtar ja kulturministtar guossin
– Gávpešillju dálveivnniin ja fiinna dálkkis šaddá erenoamážin. Midjiide lea dehálaš ahte olbmot leat bovdejuvvon. Doalut galget leat doallun buohkaide, muitala Troandima sátnejođiheaddji Rita Ottervik.
Gávpešiljus galget leat lávut, lávdi, biebmu, márkanat ja njoarostallan. Troandima guovllu biebmu ja jugus lea maid oassin doaluin.
Ráđđehus lea almmuhan ahte stádaministtar ja kulturministtar searvaba feastaipmilbálvalussii Nidarosdomenis guovvamánu 6. beaivvi. Ipmilbálvalus čájehuvvo njuolggosáddaga bokte TV:s.
Gonagas ja Dronnet leaba maid bovdejuvvon, ja Ruoŧa ja Suoma stáhtajođiheaddjit.
– Fylkkasuohkanis leat rápmásat leat mielde lágidemiin. Dál illudit mii fas beassat lágidit stuora doaluid Troandimis, muitala Lulli-Trøndelága fylkkavárresátnejođiheaddji Gunn Iversen Stokke.
Ollu doalut
Ollu lágideamit galget leat rabasin buohkaide. Lassin álbmotdoaluide ja feastaipmilbálvalussii Nidarosdomenis, de šaddá ávvučájálmas Olavshallenis. Doppe čájehuvvo musihkkateáhter vuosttaš geardde man namma lea «Fra Kautokeino til Kalvskinnet», ođđa vuosttaščájálmas «Elsa Laula» Trøndelag Teáhteris ja ollu konsearttat, dáiddačájáhusat ja seminárat.
Golmma riikka sámedikkit čađahit čoahkkimiid Troandimis ávvuvahkku.
Dušše oasáš almmuhuvvon
– Lágideamit, maid leat dál almmuhan, lea dušše oasáš das mii lea vuordimis guovvamánus boahtte jagi. Mii bargat čađat ollu áššiiguin, muitala Tråante 2017 prošeaktajođiheaddji Ida Marie Bransfjell.
