Ruoŧŧelaš, gii lei iežas ustiba mielde goargŋumin Vågakallen 943 alla váris Lofuohtas, gahčai ikte eahkedis ja dál lea Nordlándda politiijaguovllu dieđihan ahte almmái lea gávdnon jápmán.
Politiijat dieđihit ahte sii leat váldán oktavuođa albmá oapmahaččaiguin Ruoŧas ja dát lea issoras váivves lihkohisvuohta.
Eai rávve vuolgit njuoska dálkin
Albmát goarkŋuiga dan bivnnuhis davvičielggi Vågakallenis, mii lea goargŋunruvtto mii ii leat nu goargŋunteknihkalaš váttis ja hárjánan goargŋut álkit nákcejit gizzut.
Váris fertejit goargŋut geavahit nu gohčoduvvon lunddolaš sihkkarastima ja Vågakallen davvičielgi lea graderejuvvon njealját váttesceahkkái.
Goargŋunskuvlla Henningværas ii rávve olbmuid vuolgit goargut jus lea obbadálki dahje veaháš njuoska dálki.
Ii čielggas mii lea dáhpáhuvvan
Lofotenpostenii muitala Svolvær politiija bargojođiheaddji Ingar Brun ahte ii leat áibbas čielggas mii lea dáhpáhuvvan.
– Orru nu ahte lea juoidá darvviheamis mii ii leat darvánan ja dagahan ahte gahčai, dadjá son.
