Jahkeraporttas bođii ovdan ahte Romssas ja Finnmárkkus eai čovdojuvvon 176 givssidanášši.
Ohppiid-, oahpahus- ja givssidanáittardeaddji Romssa ja Finnmárkku jahkeraporta čájeha ahte 176 iešguđetlágan givssidanvásáhusa eai leat čovdojuvvon, eaige mánát leat dan veahki ožžon maid dárbbašit.
Givssidanáittardeaddji Jon Halvdan Lenning cealká preassadieđáhusa bokte ahte buot áššiin lei seamma boađus, mánát ja nuorat eai dovdan ahte ožžo veahki. – Buohkaid muitalusat leat iešguđetláganat, muhto buohkain lei oktasaš boađus 2019/2020 skuvlajagis. Sii geat dovde givssiduvvon eai ožžon dan veahki maid dárbbašedje iežaset mánáidgárddis dahje skuvllas, lohká givssidanáittardeaddji Jon Halvdan Lenning.
Eastadanbargguid oktavuođas leat áittardeaddjit fuomášan ahte eambbo mánáidgárddit ja skuvllat háliidit eambbo dieđuid ja máhtolašvuođa, ja dasa sii liikojit.
Koronavuoládus
Jahkeraporta čájeha ahte 2018/2019 skuvlajagis njidje áššit. Skuvllain ledje unnit doaimmat 2020 giđa, ja váldoágga das lei koronapandemiija.
Givssidanáittardeaddji Janne Sannes lohká ahte vaikko fysalaš givssideamit njidje, de eai nohkan. – Fysalaš givssideamit jávke ijas, muhto givssideapmi sirddii báikki digitála máilbmái, lohká Sannes.
