– Lea mánnávuođa niehku beassat gilvalit buot buoremusaid vuostá, lohká nuorra vuoddji gii Eurohpámeašttirgilvvuin beassá čájehit skuterfámuid Suttesis boahtte vahkkoloahpa.
– Lea mánnávuođa niehku beassat gilvalit buot buoremusaid vuostá, lohká nuorra vuoddji gii Eurohpámeašttirgilvvuin beassá čájehit skuterfámuid Suttesis boahtte vahkkoloahpa.
– Su vuodjinmálle lei maid mearkkašin jođánit go oidnen Niillas Kemi Hætta ovdalaš ođđajagecrossas Álttás, lohká riikajoavkku hárjeheaddji Pål Grøtte Ávvirii.
Son lea dál válljen geat besset vuodjit stuora gilvvuin Suttesis (Bodenis), ja sus lea maid jáhkku nuorra vuoddjái gii lea Guovdageainnus eret.
Duostá attistit
Son oinnii ahte Kemi Hætta vujii bures ja sus lei dakkár vuodjin mii bovttii Grøtte beroštumi. Hætta lei mielde Davviriikkalaš vuodjimis Stock-suorggis ja vujii bures, ja Norggameašttirgilvvuin šattai son nubbin.
– Dat lea hirpmáhuhtti prestašuvdna go lea ovdalaččas nu unnán gilvalan hárjánan vuddjiid vuostá. Son lea buorre ovdamearka ja čájeha bohtosiid go ieš garrasit bargá falástallamiin, lohká Grøtte.
Son lea ieš ovddeš vuoddji, muhto lea dál mielde olggobeale skutervuodjinšilju veahkeheame eará vuddjiid ovdánit. Niillas Kemi Hætta lea ge okta dain geasa sus lea buorre jáhkku dahkat bures.
– Dat mii lea buorre Niillasiin lea go son lea roahkkat go vuodjá, ja attista vai boahtá jođánit ovddemusaid lusa – jus sus lei heajos vuolgga. Seammás vuodjá son várrogasat go ferte dahkat dan.
Biti maŋisčuovvu
Jostein Biti rájes eai leat Guovdageainnus leamaš vuoddjit bajimus dásis. Lea riikkajoavkku hárjeheaddji mielas hui somá go Guovdageainnus fas lea vuoddji gii bures vuodjá.
– Lea hui somá go Guovdageainnu vuoddji fas lea mielde gilvvohallame buoremusaid fárus. Lea somá go bohtet ođđa vuoddjit, go dat boares vuoddjit leat heaitán, lohká Grøtte ja čujuha Josten Bitii, gii lávii muhtin jagiid dás ovdal gilvvohallat alla dásis.
Bávččagahttán juolggi
Niillas Kemi Hætta lea 18-jahkásaš, ja lea aiddo gilvvohallagoahtán bajimus Pro Stock gilvvohallandásis. Son lea čieža jagi jo vuodján skohtercrossa, ja dál lea olahišgoahtán alimus mihtuid vuodjimis.
– Lea mánnávuođa niehku beassat gilvalit buoremusaid vuostá. Dat lea álo leamaš mu mihttu, lohká Hætta.
Ii leat ieš nu sihkar movt galgá vuodjit gilvvohallamis, go lea bávččagahttán juolggi. Dál lea buohccindieđihuvvon.
– Mus lea okta lađassuotna mannan gaskat. Ferten gal oaidnit ja hárjehallat juolggi. Ii šatta gal áibbas 100 proseantta dalle, muhto sáhtán vuodjit, lohká son ja illuda čavget gilvvuide.
Proffavuoddji gearggus Suttesii
Malene Trosten Andersenis geas lea proffašiehtadus Amerihkás, ja lea doppe gilvvohallan skutercrossas dán dálvvi. Dál lea gearggus vuodjit Bodenis World Cupas.
Son bávččagahtii juolggi dán dálvvi, ja ferte dearvvašmuvvat nu olu go sáhttá vuodjimiid
rádjái.
– Malene berre fokuseret ollet mollii juohke vuorus ja dan bokte nagodit buriid bohtosiid. Mii eat gáibit nu ollu sis geat leat aiddo roasmmohuvvan, lohká Grøtte.
– Deháleamosin buohkaide lea čađahit vuodjima ja ollet mollii. Leat guhkes vuodjimat, ja ferte leat taktihkalaččat jierbmái, lohká Pål Grøtte. Son ii loga gal eará hástalusaid leat go gulahallat gaskaneaset vuddjiiguin ja ráhkadit vuodjinjoavkkuid ovdal gilvvuid.
