Sámi Giellagáldu lea fásta davviriikalaš fágaorgána sámi giellaáššiin. Dál leat vihtta ođđa bargi virgáduvvon.
Sámi Giellagáldu ulbmil lea gáhttet, seailluhit ja ovddidit kulturárbbi man sámegielat ovddastit. Sámi Giellagáldu lea čadnon Norgga Sámediggái ja galgá doaibmat golmma riikkas: Norggas, Ruoŧas ja Suomas, ja bargat sámegielaid normeremiin riikarájiid rastá. Sámi Giellagáldu šattai bistevaš doaibman diibmá.
Dál lea Giellagáldu direktevra Mika Saijets virgadan vihtta ođđa giellabargi Sámi Giellagáldui.
Nuortalašgiela bargin lea Tauno Ljetoff virgáduvvon. Anárašgiela giellabargin fas Marja-Liisa Olthuis ja davvisámegiela bargin Sierge Rasmus. Lullisámegiellabargin lea Siri Kappfjell Päiviö váljejuvvon ja julevsámegiela bargin fas Naima Khan Nergård.
Lihkostuvvan
Giellagáldu direktevra Mika Saijets lea ilus.
– Mii leat hui ilus go leat lihkostuvvan bures rekrutterenbargguin ja leat ožžon iežamet jovkui nana fágaolbmuid, dadjá giellagáldu jođiheaddji Mika Saijets Yle Sápmái. Njeallje giellabargi álget virgái čakčamánu álggus. Julevsámegiela bargi Naima Khan Nergård bargagoahtá boahtte jagi guovvamánu rájes, muitala Saijets.
