Dán jagi leat registrerejuvvon 164 geatkečivgama Norggas ja Ruoŧas, dat leat njeallje eanet čivgama go diibmá.
Lassáneapmi lea leamaš Ruoŧas, gos čájehuvvo ahte leat 19 eambbo geatkečivgama. Norggas leat čivgamat njiedjan diimmážis.
– Ii leat stuora lassáneapmi Skandináva dásis, muhto mii oaidnit stuora erohusaid riikkaid gaskka. Ruoŧas leat duođaštuvvon 119 geatkečivgama, mii lea 19 proseantta eanet go diibmá. Norggas ges leat duođaštuvvon 45 geatkečivgama, mii lea 25 proseantta unnit go diibmá, dadjá Rovdata jođiheaddji Jonas Kindberg preassadieđáhusas.
Vaikke lohku lea njiedjan Norggas, de lea ain geatkenálli badjel dan nállemeari man Stuoradiggi lea mearridan, mii galgá leat 39 geatkečivgama jahkái.
