Sihke Trygg Trafikk ja Stáhta geaidnodoaimmahat vuorjašuvvet go eanet nuorat jápmet johtolatlihkohisvuođain.
Geassemánus, suoidnemánus ja borgemánus jápme oktiibuot 42 olbmo Norgga johtolagas. Dat leat vihtta unnit go seamma áigodaga diibmá, čájehit Stáhta geaidnodoaimmahaga logut.
Vaikke jápminlogut leat njiedjan diimmá ektui, de lea Stáhta geaidnodoaimmahat ja Trygg Trafikk vuorjašuvvan go eanet mánát ja nuorat jápme johtolagas mannan geasi. Oktiibuot jápme logi máná ja nuora geat ledje gaskkal 6-19 jagi, golmmas ledje vuollel 16 jagi boarrásat.
– Menddo olu nuorra olbmot jápmet johtolagas ja lea erenomáš vuorjašuhtti go oaidnit ahte máŋggas jápmet seamma lihkohisvuođain. Mii eat dovdda vel duogáža mannan geasi jápminlihkohisvuođaide, muhto mii diehtit ahte biilaboagán gádju olu olbmuid ja ahte biilavuoddji ferte áicil ja čielggus, lohká Stáhta geaidnodoaimmahaga johtolatsihkkarvuođa jođiheaddji Guro Ranes preassadieđáhusas.
Eanet nuorra nieiddat jápmet
2023:s leat dássážii jápmán 13 nuora gaskal 15-19 jagi. Geassebottas eai leat ná olu nuorat jápmán 2009 rájes ja statistihkka čájeha ahte eanet nuorra nieiddat jápmet lihkohisvuođain. Guhtta nieidda jápme geasi johtolatlihkohisvuođain, ná badjin eai leamaš logut 1997 rájes.
– Lea hirbmat stuorra roassu go mánát ja nuorat jápmet johtolagas. Dat lea nu ulbmilmeahttun ja čuohcá garrasit bearrašiidda, ustibiidda ja báikkálaš servodagaide. Go jápminlihkohisvuođat, mas mánát ja nuorat jápmet, leat njiedjan guhkit áigge badjel, de lea erenomáš vártnuheapme go nu oallugiid massit oanehis bottas, lohká Trygg Trafikk fágajođiheaddji Bård Morten Johansen preassadieđáhusas.
Eanaš nuorat jápme lihkohisvuođain mas vuodjenfievru beaškkehii oktii eará mohtorfievrruin dahje vujii badjelgeainnu.
– Dakka maŋŋel duođalaš lihkohisvuođaid main nuorat jápmet, de ohcet ekspearttat vástádusaid, muhto dál eat vel dieđe manin lihkohisvuođat deaividedje. Juohke áidna jápminlihkohisvuohta lea suorggatlaš, ja mii fertet daid eastadit. Mii fertet vuoruhit doaimmaid mánáid ja nuoraid ektui, lohká Johansen.
82 olbmo leat dássážii jápmán
Dássážii dán jagi leat 82 olbmo jápmán johtolagas, dat lea okta unnit go seamma áigodaga diibmá.
80 proseantta jápminlihkohisvuođain deaividedje go mohtorfievrrut beaškkehedje oktii dahje go vudje badjelgeainnu.
Dán jagi leat eanet nissonolbmot jápmán johtolagas, oktiibuot 24.
Mohtorsihkkellihkohisvuođat leat njiedjan. 2022:s ledje čakčamánu rádjai jápmán 19 olbmo mohtorsihkkellihkohisvuođain, dán jagi lea lohku 13.
