40 km ođđa asfálta galgá biddjot dán geasi fylkkaluottaide ja 79 km asfálta riikaluottaide.
40 km ođđa asfálta galgá biddjot dán geasi fylkkaluottaide ja 79 km asfálta riikaluottaide.
– Mii vuoruhit daid luottaid main leat eanemus rokkit ja ráiggit, vai gáhttet johtolatsihkarvuođa, muitala Stáda geaidnodoaimmahaga Finnmárkku ossodaga doaibmi jođiheaddji Oddbjørg Mikkelsen.
Guovddášbáikkiid vuoruhit
Dasa lassin go luottaid buoridit, de galget maid eará ráiggit ja rokkit divvojuvvot.
– Dán jagi galgat vuoruhit gávpogiid ja guovddášbáikkiid mat leat bázahallan divodemiin ja gos maid lea ollu johtolat. Báikkit nu go Čáhcesuolu, Gáŋgaviika, Ákšovuotna ja Áltá leat vuoruhuvvon báikkit, muitala Finnmárkku fylkkasuohkana johtolaga váldolávdegotti jođiheaddji Geir Ove Bakken.
(Ášši joatká gova vuollel)
Dán jagi lea biddjon 33 miljovnna ruvnno fylkkaluottaid ođđa asfáltii. Dan dihte go oljohaddi lea nu vuollin, de šaddá eanet asfálta juohke ruvnno ovddas dán jagi diimmá jagi ektui.
Plánat sáhttet rievdat
Finnmárkku riikageainnuid ovddas lea šihttojuvvon 79 km ovddas asfalteren, ja lassin galgá 30 km smávit osiin divvojuvvot. Olggosgolut gártet 75 miljovnna divodemiide, muhto dát sáhttá rievdat jus vuoruhit dušše divodit ovdalii go bidjat asfálta buot báikkiide.
– Finnmárkku fylkkagielda áigu doalahit mihtu ahte unnimusat 100 km luddii galgá biddjot asfálta jahkásaččat Finnmárkkus, dadjá Bakken.
Asfalterenbarggut álget miessemánu loahpas. Dán kárttas oainnát makkár luottaid galget divodit dán geasi.
