-Almmuhus-
OĐĐASATDál bidja­gohtet asfáltta geainnuid ala

Dál bidja­gohtet asfáltta geainnuid ala

-

-

Stáhta geaidnodoaimmahat dieđiha ahte jahkásaččat lebbejuvvo miljovdnabeale tonna asfálta riikageainnuid ala.

Oktiibuot lea Stáhta geaidnodoaimmahat soahpan dán jagi asfáltaáigodahkii 24 šiehtadusa. Árvu das lea oktiibuot 800 miljovnna kruvnna. Muhtin báikkiin leat juo asfáltafitnodagat olles barggus juo. Dán áiggi deattuhuvvo CO2-nuoskkideapmi go juolludit bargošiehtadusaid. Ovdalis áiggi mearridii hálbbimus haddi, muhto dál bidjá Stáhta geaidnodoaimmahat dálkkádat- ja birasgáibádusaid šiehtadusaid. 

– Norga lea njunnošis mii guoská CO2-luoitima geahpedeapmái. Stáhta geaidnodoaimmahaga mihttomearri lea geahpedit CO2-luoitima asfálttas 70 proseanttain ovdal 2030:s, lohká Stáhta geaidnodoaimmahaga asfáltajoavkku jođiheaddji Thor Asbjørn Lunaas preassadieđáhusas. 

Stáhta geaidnodoaimmahahkii lea dehálaš ahte asfálta bistá guhká go dat lea buorre goluid ja nuoskkideami ektui. Lunaas lohká ahte go sii šiehtadit asfáltafitnodagain, de lea fitnodagaid máhttu ja vásáhus ávkkálaš Stáhta geaidnodoaimmahahkii. Geaidnodoaimmahat muitala ahte sii leat 1990 rájes jahkásaččat guorahallan man guhká asfálta bistá, nu ahte sii dihtet bures mo geainnuid dilli lea. Eanaš bargu dahkko ihkku ja Lunaas ávžžuha buohkaid čábbát vuodjit go lea geaidnobargu. 

– Sii han barget min ovddas, muittuha Lunaas. 

-Almmuhus-