Finnmárku lea ožžon ruđa Seastinbáŋku 1 Davvi-Norgga Seastinbáŋkuvuođđudusas lágidit geasseskuvlla fidnofága ohppiide. Dat lea máŋgga jagi ovttasbargudoaibma Finnmárkku ja vuođđudusa gaskka mas ulbmil lea bajidit ohppiid joatkkaskuvlaoahpu čađaheami Finnmárkkus.
Oahppit, geat leat ožžon 1 árvosátnin oktasašfágas fidnofága oahpus, ožžot ođđa vejolašvuođa gealbudahttit iežaset viidát ohppui dahje oahpahallisadjái geasseskuvlla bokte. Dat leat maid rabas kurssat ovddeš ohppiide ja oahpahalliide geat leat ožžon árvosáni 1 dahje eai leat árvvoštallon.
Geasseskuvlafálaldat lea njealji joatkkaskuvllas Finnmárkkus: Hámmerfeasttas, Álttás, Girkonjárggas ja Čáhcesullos. Lea vejolaš váldit matematihka, luonddufága ja eŋgelasgiela, muhto fágat ja álgomuddu sáhttet molsašuddat skuvllas skuvlii.
