Álttá joatkkaskuvla lágida dán vahkku sámi oahppofestivála.
Sámi oahppofestivála álgá mánnodaga 5.2. Dalle lea ovdapremieara «Eallogierdu» filmmas Álttá kinos. Girjerádjosis ges lea bargobadji gos ráhkadit guovvamánu 6. beaivvi sløyfaid Marit Karlsena designa vuođul.
Sámi álbmotbeaivvi leat ávvudeamit beaivvi miehtá. Almmolaš prográmma lea 0845-1100. Dat leat oktasaš doalut buot skuvlla ohppiide ja bargiide. Sámediggepresideanta Silje Karine Muotka doallá sártni.
– Vai buohkain lea vejolašvuohta čiŋadit gávttiin dan beaivvi, de ii leat dábálaš oahpahus dan beaivvi. Beaivvi prográmmas leat baicce iešguđetlágán doaimmat maidda oahppit sáhttet searvat, čállá Álttá joatkkaskuvla.
Doaimmat dán beaivvi leat earret eará gákte-catwalk, njoarosteapmi, borramušráhkadeapmi, duodjebadji ja vejolašvuohta geahččat sámi filmmaid. Beaivet guossuhuvvo maid biđus. Gaskavahkku 7.2. lea musihkkasuorggi ohppiid laboratoriaijabargu maid Andreas Fliflet lágida. Oahppit gean lea sámegiella nubbegiellan ráhkkanit ges čájálmasa ráhkadit máidnasa «Beaivvi bárdni» vuođul. Muđui lea dan beaivvi vejolaš oahppat šattuid ja urttaid čoaggima ja anu birra. Dan oasi lágida Svanhild Elisabeth Ring-Husker.
Duorastaga 8.2. doallá dutki Eva Josefsen logaldallama dáruiduhttima birra ja dáhpáhuvvá go dat ain.
Fylkkajuoigi galleda dan beaivvi skuvlla Viktor Bomstand ja juoigá doppe. Ivar Beddari ges dollesta standup-šovva ja fállá musihkalaš guoimmuheami dan birra mo lea go olbmos lea sihke dáža ja sámi identitehta.
Seamma beaivvi ovdanbukta Malene Stensrud Nilsen osiid iežas masterdutkamušas «Eg e sjøsame, ikke ekte same liksom».
Bearjadaga 9.2. álggahit skuvlabeaivvi konsearttain. Piera Eira ja Lena Thuri doallaba konseartta.
Dasto besset oahppit ja earát gullat Ánde Somby/UiT logaldallama dáruiduhttima ja seanadeami birra.
Muđui lea juohke beaivvi olles vahkku minifilbmafestivála «Blackboxas» gos čájehit sámi filmmaid olles vahkku.
