-Almmuhus-
KULTUVRAGearggus? Dál álget beassášfestiválat

Gearggus? Dál álget beassášfestiválat

-

-

Guovdageainnus ja Kárášjogas leaba beassášbuvttadeaddjit gergosat sávvat buohkaid bures boahtima. Goappašagat bargaba buoremus lági mielde fállat iežaska prográmma vai justa don geasuhuvvot doaluide.

– Mis leat nu olu doalut Guovdageainnus ahte ii leat go ráhkkanit albma buori sámi beassášdoaluide. Min prográmma heive buohkaide ja munnje lea dehálaš ahte sámevuohta lea guovddážis. Dáppe leat máŋga dáiddačájáhusa, mis lea lohkan- ja stoahkanboddu mánáide, mis leat girje- ja CD-almmuheamit ja dáppe lágiduvvojit oaggungilvvut, njoarostangilvvut, heargevuodjimat ja skohtercrossat sihke mánáide ja ollesolbmuide. Mis lea teahterčájálmas ja diehttelasat mii lágidat beassášlávvardaga sukseassadoaluid Sámi Grand Prix 28. geardde. Skilleduorastaga lea juoigankonsearta ja Sámi Jienat Báktehárjjis. Guhkesbearjadaga fállat Ofelaš filbmakonseartta Marja Mortenssonain, Jan Ole Hermansen joavkkuinis, Isák ja Biru Baby Báktehárjjis. Beassášlávvardaga leat Inger Maret Nilut, Ivnniiguin ja Maxida Báktehárjjis. Ii leat go ráhkkanit, geasuha Guovdageainnu beassášfestivála buvtta­deaddji Ol Johan Gaup.

 

Kárášjogas maid gergosat


Kennet Eliassen

Maiddái Kárášjogas leat ráhkkanan bures.

– Mii leat oahppan dál. Eat ábut ovdamearkka dihte vuordit daid buoremus joavkkuid diŋgot. Mii leat ovdal juovllaid juo bovden Kárášjoga beakkálmasaid beassáš­lávvardahkii. Dáppe čuojahit de Felgen, Rolffa Feat  GM ja Intrigue ja mii vuordit spagga dievva valáštallanhálla dalle. Beaivet juo leat hirbmat márkanat dáppe go beakkán Stadioncross lágiduvvo guovdu márkana. Mii leat maid oahppan ahte gaskavahku lea beare árrat álggahit doaluid ja leat sirdán rahpama skilleduorastahkii. Almmolaš rahpan šaddá heargesprinttas. Dohko leat dál bidjan eambbo návccaid ja Kevin Boine galgá bottus čuojahit. Eahkedis fas leat Plumbo ja Staysman. Dasa maid nu de illudat. Guhkesbearjadaga lea earret eará Transjoik, ja soaitá maŋimuš vejolašvuohta sin vásihit. Muđuid leat kárášjohkalaččat hirbmat mielas kurssaide. Danne fállojuvvojit duodje- ja teáhterkurssat mánáide ja nuoraide, geasuha Kárášjoga Beassášfestivála buvttadeaddji Kenneth Eliassen.  

 

– Dehálaš arena sámi artisttaide


Ol Johan Gaup

Dan botta go Kárášjogas leat sihke sámi ja dáčča artisttat, de Ol Johan oaidná beassášfestivála dehálaš arenan sámi artisttaide.

Danne leage Guovdageainnu beassášlávdi vuoruhuvvon sámi artisttaide.

– Beassášmárkanat leat leamaš dán rájes go girkostallamat álge Sámis. 1971-72:s álge beassášfestiválat. Dan rájes leat ovdánan ahte ovdánan. Dát lea oba dehálaš arena sámi artisttaide. Jus geahčastat Grand Prixii, mii juohke jagi lea spagga dievva, de lea dat dehálaš arena sámi artisttaide. 2001 rájes leat 105 ođđa lávlaga ja 174 luođi almmuhuvvon. Dan ovdal leat logi jagi doalut main lávlagat ja luođit eai leat almmuhuvvon. Ja de jurddašat buot dan musihka mii lea buvttaduvvon go dieđihit gilvvuide. Jáhkán unnimus 500 lávlaga ja unnimus liikká olu luođi ráhkaduvvon. Olles beassážiid besset sámi artisttat deaivvadit kollegaiguin, juogadit vásáhusaid ja diehttelasat čájehit iežaset gehččiide ja guldaleddjiide. Sámevuohta ja sámi artisttat leat dehálaččat
sámi festiválaide,  lohká Ol Johan Gaup.

– Dáinna buriin prográmmain sávan olbmuide bures boahtima. Mii sávvat miehtá Norggas ja Finnmárkkus bohtet deike. Mis leat nu máilmmi buorit artisttat, lohká Eliassen.

 

Čállán: Anne Berit Anti

-Almmuhus-