Sotnabeaivve almmuhit ja geigejit Hedda-bálkkašumiid Nationaltheatret:is Oslos. Beaivváža hoavda Rolf Degerlund lea dieđusge dohko.
Sotnabeaivve almmuhit ja geigejit Hedda-bálkkašumiid Nationaltheatret:is Oslos. Beaivváža hoavda Rolf Degerlund lea dieđusge dohko.
Beaivváš Sámi Našunálateáhter lea nammaduvvon Hedda-bálkkašupmái čájálmasaineaset “Vidas Extremas» kategoriijas “dán jagi čájálmas”. Heddabálkkašupmi lea Norgga deháleamos teáhterbálkkašupmi. Ja dán sotnabeaivvi gullat šaddá go eanet go nammadeapmi.
– Teáhter lea gal juo vuoitán go lea árvaluvvon vuoitin, dadjá teáhterhoavda Rolf Degerlund movttegit preassadieđáhusas. Son lea Oslos sotnabeaivvi ja sávvá dieđusge oažžut hui buriid ođđasiid.
Oktii ovdal vuoitán
Lassin Beaivváža čájálmassii, mii lea maya-sámi-dáro čájálmas “Vidas Extremas – dánsa eallima ravddamusas”, leat njeallje eará čájálmasa nammaduvvon seamma bálkkašupmái.
Beaivváš sámi našunálateáhter lea okte ovdal vuoitán Hedda-bálkkášumi, namalassii jagi 2000:s kategoriijas “buoremus lávdi ja biktasat” sin čájálmasain “Vølundda muitalus”. Dan čálii Adam Levine, Biret Maret Hætta lei bivttashábmejeaddji ja Aage Gaup fas lávdehábmejeaddji.
– Dán háve leat nammaduvvon buot neavttárat, dáiddalaš jođihanjoavku ja olles teáhter, ovttas ovttasbargobuvttadeddjiiguin ja buohkat buvttadusas, ja geat maid dasto dáidet geahččat bearrái ahte ođđa Hedda statueahtta darvvihuvvo betoŋgaseaidnái suohkanlaš kulturvissui Guovdageainnus, gos Sámi Našunálateáhter doallá viesu, čállet sii preassadieđáhusas.
Geahččat njuolggosáddaga
Bálkkašumiid geigejupmi álgá sotnabeaivvi 12.6. diibmu 17:00 Nationaltheatret:is Oslos ja bistá sullii diimmu ja golbma kvárta. Dát čájehuvvo videonjuolggosáddaga bokte www.heddaprisen.no siidduin.
