Dán jagi leat 233 moskusa Dovreduoddaris, mii lea 33 moskusa menddo olu hálddašanplána ektui. Stáhta Luonddubearráigeahčču dieđiha ahte sii geahpedišgohtet moskusnáli doppe.
– Dán čavčča moskuslohkamat Dovreduoddaris Mátta-Norggas čájehit ahte lohku lea lassánan 233 eallái, muitala Stáhta Luonddubearráigeahču (SLB) seniorneavvu Tord Bretten NRK.no neahttasiiddus duorastaga iđđedis.
Son muitala ahte SLB áigu geahpedit moskusnáli logu gitta 200 eallái, nu mo lea mearriduvvon moskushálddašanplána 2017:s vissis mearriduvvon guovllus Dovreduoddaris. Tord Bretten muitala ahte sii leat vuordán dan bohtosa, vaikko mannan geasi jápme moadde moskusčivgga geahpesboalddáhahkii. Ulbmil lea ahte moskusnálli galgá beassat ovdánit lunddolaččat dan guovllus, muhto dálvečora ii galgga eanet go 200 ealli. Ovttaskas elliid mat guđđet guovllu, fitná SLB báhčimin eret.
Tord Bretten váruha olbmuid lahkonit ráfálaš moskuselliid go dat sáhttet fallehit olbmuid ja ruhttet leavttus. Leaktu sáhttá leat 60 km/t.
Moskus (Ovibos moschatus) lea árktalaš guoberealli ja fuolki sihke sávzii ja gáicii vuoksábearrašis. Moskus lea amas nállešládja Norggas, vaikko oktii áigá elii dán guovllus. Olbmot bukte 1931:s Ruonáeatnamis moskusealli Norgii Dovreduoddarii. Moskusat ellet lunddolaččat Davvi-Amerihkás ja Ruonáeatnamis. Rávis moskus deaddá gaskal 180-410 kilo ja eallá gaskal 12-20 jagi.
