Politiijat dieđihedje diibmu 12.03 ahte nieida lea gávdnon dearvan, Ávvir ođasta ášši dađistaga.
Politiijat dieđihedje diibmu 12.03 ahte nieida lea gávdnon dearvan, Ávvir ođasta ášši dađistaga.
OĐASTUVVON DII. 12.13: Nuorta-Finnmárkku politiijaguovlu dieđihii twitter bokte diibmu 12.03 ahte nieida (15) guhte lei leamaš jávkosis ievttá eahkeda rájes, lea gávdnon dearvan.
Davvi-Norgga váldogádjunguovddáža gádjunjođiheaddji Frode Iversen muitala ahte Nuorta-Finnmárkku politiijat leat singuin váldán oktavuođa diibmu 10.04 oažžundihte helikoptera mainna ohcet nieidda.
Banak girdišiljuis Leavnnjas sáddejuvvo dál helikopter Vuonnabahtii Unjárgga gildii Nuorta-Finnmárkui.
Politiijat galget ovdal go bivde helikotera, ožžon cavgileami man álggos iske. Go dat cavgileapmi ii doallan deaivása, bivde helikoptera mainna ohcet.
Guovtti áigge dieđihuvvon láhppon
Nuorta-Finnmárkku politiijat čálle iđđes badjelaš beal ovccis Twitteris ahte sii 15 jahkásaš nieida lea dieđihuvvon láhppon Vuonnabađas. Politiijat leat gulaskuddan odne iđđes leago oktage oaidnán nieidda (15) gii lea leamaš jávkosis guđa rájes ikte eahkes.
Nieidda áhčči dat dieđihii politiijaide vehá badjelaš diibmu guovttis mannan ija, ahte 15-jahkásaš ii lean boahtán ruoktot viehkanmátkkis.
– Bargan maid leat sáhttán
Nuorta-Finnmárkku politiadvokáhtta Jens Bernhard Herstad lohká sin váldán álggu rájes dán dieđu hui duođalaččat. Ovttain biillain leaba guokte poltibálvvá ohcan nieidda ihkku ja iđitdiimmuid.
– Mii leat duođalaččat váldán dán dieđu, ja leat bidjan ovtta patrulja ohcat juo beal golmma áiggi ihkku. Dat patrulja lea vuodján dihto čujuhusain ja bargan ihkku, maiddái jearahallan olbmuin. Eai leat makkárge bohtosat leamaš, ja mii ohcat viidát. Mii leat dál lasihan ohcannávccaid ja gohččon buktit guorranbeatnagiid ja Siviilasuodjalusa ja Rukses ruossa ohcanveaga boahtit veahkkin. Dasa lassin lea helikopter dál manname ohcanbargui, dadjá Herstad. Son ii dieđe muitalit gal man stuora ohcanveagat leat biddjon johtui.
Politiijain lea ohcanguovddáš ráđđeviesu luhtte gos lágidit ohcanakšuvnna.
Leat go dus cavgileamit áššis? Sáddes daid redaksjonen@avvir.no čujuhussii.
Dákkár lea láhppon nieiddaš oaidnit:
Son lea 1,60 m guhkki, leat ruškes vuovttat biddjon seaibin, čáhppesalit arvejáhkka ja rosa ja čáhppes baskkes hárjehallanbuvssat.
Sii bivdet cavgilemiid telefunummarii 02800.
Manai viehkat
Ii oktage leat oaidnán nieiddaža maŋŋel diibmu 18 ievttá eahkeda.
Nieidda áhčči dat dieđihii politiijaide vehá badjelaš diibmu guovttis mannan ija ahte 15-jahkásaš ii lean boahtán ruoktot viehkanmátkkis.
– Son manai viehkat olggos hárjehallama dihte. Dan rájes go viehkalii ruovttus, ii leat oktage oaidnán su. Mii leat dál iskame juohke sajes sáhttá go oktage oaidnán su, ja leago son mannan eará sadjái. Mii viežžat dieđuid taksiin, bussiin, olbmáin, oahppásiin. Mii guorrat luottaid su telefuvnnas, Facebookas, Twitteris ja nu ain.
Nu muitala Nuorta- Finnmárkku politiijaid operašunjođiheaddji Svein Erik Jakobsen Ávvirii iđđes beal logi áigge.
Politiijat eai lean vel iđđes álggahan ohcanakšuvnna. Jakobsen ii diehtán vel muitalit láve go nieiddaš viehkat guhkás eret ruovttus ja guđe guovllus son láve viehkat.
Politiijat eai leat vel dáhtton muitalit nama nieiddas.
Ávvir čuovvu ášši!
