– Mii oaivvildat hui dehálažžan ahte min sámi našunálateáhter seailu ja oažžu dohkálaš visttiid ja bargobirrasa, vai ain sáhttet bargat sámi kultuvrra ovddas ja ovdánahttit, reflekteret ja hástalit sihke dáža- ja sámeservodaga.
– Mii oaivvildat hui dehálažžan ahte min sámi našunálateáhter seailu ja oažžu dohkálaš visttiid ja bargobirrasa, vai ain sáhttet bargat sámi kultuvrra ovddas ja ovdánahttit, reflekteret ja hástalit sihke dáža- ja sámeservodaga.
Dan dadjá Geir Ove Bakken guhte lea Finnmárkku Fylkkagieldda Kultur ja johtalus váldolávdegotti jođiheaddji.
Lávdegotti čoahkkimis miessemánu 26. beaivvi dat politihkkárat čelke ahte ollásit dorjot Beaivváš Sámi Našunálateáhtera rahčamuša ođđa teáhtervistti oažžut huksejuvvot.
– Árvvoheapme
Teáhter lea 2005 rájes áŋgiruššan oččodit sierra teáhtervistti. Teáhteris lea leamaš fásta poasta stádabušeahtas 1991 rájes, ja 1993:s definerejuvvui Beaivváš okta Norgga našunála teáhterásahusain, seamma dásis go Našunálateáhter, Norgga teáhter ja Našunála Lávdi.
Dán njealljásis lea dušše Beaivváš mas ii leat sierra teáhtervisti.
– Badjel 30 jagi lea Norgga sámi našunálateáhter doaibman gaskaboddosaš visttiin, Guovdageainnu suohkana Kulturviesus. Dál eai leat visttit dušše gollan ja unnán anihahtti, muhto sáhttet maid dagahit dearvvašvuođaváttuid. Dás rájes eai sáhte šat bargat dálá visttis, ja dat lea árvvoheapme go lea sáhka teáhteris mii lea našunála dásis, celket politihkkarat.
– Našunála ovddasvástádus
Lávdegoddi oaivvilda Beaivváža, gitta ásaheami rájes 1981:s, dahkan erenoamáš buori barggu ovddidettiin sámi kultuvrra, giela ja historjjá sihke Finnmárkkus, Norggas ja Davviriikkain.
– Sámi našunálateáhter lea našunála ovddasvástádus, ja Sámediggi ovttasráđiin Kulturdepartemeanttain ferte dál gávdnat čovdosa dán hirbmat hástaleaddji vistedillái mas Beaivváš lea, oaivvilda lávdegoddi
