Leat go iskan iežat Trumf-konto maŋemus áiggiid? Jus it, de sáhtát oažžut buriid ođđasiid.
Norgga badjel 2 miljovnna Trumf-kundaris lei badjel 1,51 miljárdda ruvnno Trumf-konttuin oktiibuot go jahki 2020 álggii. Dat lea badjel 150 miljon ruvnno eambbo go jagi áigi, ja dat lea dat alimus supmi dán rádjai.
Finnmárkkus leat 23 895 Trumf-kundara ja sis lea gaskamearálaččat 593 ruvnno kontos. Oktiibuot dahká dat 14 172 156 ruvnno.
Gaskamearálaččat vel eambbo
Norgalaččain lea gaskamearálaččat vel eambbo Trumf-konttus, namalassii 750 ruvnno lea gaskamearálaš supmi. Ja sis geain lea buot eanemus leat ge čohkken badjel 10 000 ruvnno Trumf-kontui. Dáid ruđaid ii gánnát diktit dan konttus, go Trumf-konttus eai leat reanttut.
Norgesgruppen ja Kiwi
Trumf lea bonusortnet man Norgga stuorimus borramušfitnodat Norgesgruppen, mas leat gávppit nu go Kiwi, Meny, Joker ja Spar, atná.
Kiwi lea ge dat gávpi gos eatnasat čogget Trumf-ruđaid. Sihke go sis leat eanemus kundarat ja maid go leat almmuhan lassi bonusa jus oastá varas guoli Kiwis.
Dasa lassin leat ge maid sihke Esso ja Shell mielde ortnegis, ja dáin boaldámušgávppiin čoaggá ge lassin Trumf-ruđaid.
