Finn Hågen Krogh árvvoštallan heaitit gilvočuoigamiin.
Finn Hågen Krogh árvvoštallan heaitit gilvočuoigamiin.
Gieskat beakkehii ahte Norgga falimus čuoigiguovttos Martin Johnsrud Sundby ja Therese Johaug leaigga gávnnahallan geavahan lobihis ávdnasiid.
Fállejohkalaš ja riikkajoavkku čuoigi, Finn Hågen Krogh, muitala Aftenposten.no aviisii ahte sutnje lei oalle lossat gullat dan.
Dalle son gal árvvoštallagođii ii got leat buoremus heaitit čuoigin.
– Nie uhcán sáhttá gomihit olles eallima
Martin Johnsrud Sundby ii leat vástidan gažaldagaid, iige doavttir ge leat maidege jienádan. Sundby dupmehalai ahte lei geavahan menddo olu ástmádálkasa ja guovtti vahku das ovdalis ges beakkehii Johaug ášši.
– Dan guokte vuosttaš jándora in measta nagodan dan áddet, lohká Finn Hagen Krogh aviisii.
Muitala áhčis sáddestan jearaldaga telefuvnna bokte mo manná bártniin.
– Vástidin ahte manná bures, muhto jurdda ahte nie uhcán sáhttá gomihit olles eallima dan guvlui masa in hálit searvat, lohká Finn Hågen Krogh.
26 jahkásaš riikkajoavkku čuoigi logai iežas smiehtan moadde beaivvi ja mearridan joatkit čuoigin vaikko lea olu riedja čuoiganberošteaddji norgalaččain.
Lohká son liiko ahte olbmot eai leat mielas ahte valáštallit dopejit iežaset vai šaddet gievrrat ja sávrrit vuoitin dihtii.
– Ii leat sáhka dopemis
Muhto Krogh deattuha ahte ástmádálkasiin ja gávjjuiddahtinrusttegis ii leat sáhka dopemis.
Lohká iežas áddet ahte muhtumiidda ii oro dát riekta, muhto oaivvilda ahte dás lea sáhka boastto áddejumis.
– Jus olbmos lea nuorvu dahje eará, de geahččala olmmoš dearvvasmuvvat, čilge Finn Hågen Krogh.
