Covid-19 ja influeanssa njoammun lassána boahttevaš vahkuid, čállá FHI vahkkosaš raporttas.
Instituhta dieđuid mielde lea dehálaš vuhtii váldit olbmuid geat sáhttet buohccát garrasit vuoiŋŋahatdávddaid geažil.
– Dat guoská earenoamážit njuoratmánáide, bissovaš buhcciide ja boarrásiidda.
Ávžžuhit boahkuhit
Áitojuvvon joavkkut ávžžuhuvvojit boahkuhit nu johtilit go vejolaš, jos sii eai leat ovdal boahkuhuvvon.
– Dán áigodaga influeansaleavvan lea jođus, ja njoammunviidodat lassána boahtte vahkuid, dieđihit sii.
Lea eahpesihkarvuohta viidáset ovdáneami ektui go ođđa covid-19-virusvariánta lea ilbman. Jáhkkimis dávda njoammu eanet juovllaid rádjái.
Dán áigodaga influeansa lassána jáhku mielde seammás go ollugat deaivvadit juovladoaluide.
