Dat go nuorat geavahit ollu áiggi sosiála mediain ii leat dat mii lea váttisvuohta ovdáneamis, čájeha Álbmotdearvvašvuođainstituhta (FHI) iskkadeapmi.
Nuorain, geat dávjjibut dovdet ahte earát gozihit sin sosiála mediain oaidnin dihte maid sii barget, gos sii leat dahje geaiguin sii leat ovttas, leat baicca dávjjibut go earáin balu ja deprešuvnna dávdamearkkat, FHI dieđuid mielde.
Oktiibuot 2000 nuora Bergena joatkkaskuvllas leat mielde dán guorahallamis.
Dutkit gávnnahedje ahte sii, geain ledje balu ja deprešuvnna dávdamearkkat, dávjjibut vástidedje ahte sii dovde gozihuvvon sosiála mediain, ja háliidivčče oahppat eanet das mo geavaheapmi váikkuha sidjiide. Dutkit oaivvildit ahte dat cealkámušat leat «gáldun vuorjašupmái».
– Ii dárbbaš leat váttisvuohtan
– Lea dasto eará go olu áigegeavaheapmi mii lea váttisvuohtan sosiála mediain, dadjá FHI dutki Turi Reiten Finserås.
Dutkit eai áiggo dattetge konkluderet ahte sosiála mediat dagahit psyhkalaš váttisvuođaid muhtin nuoraide.
– Psyhkalaš váttisvuođaid sivvan sáhttet leat eará áššit maid mii eat leat guorahallan, dadjá Finserås.
– Min guorahallan nanne ahte áigegeavaheapmi ii leat buorre mihttun váttisvuođaid dáfus sosiála mediaid geavaheamis. Guorahallan čájeha ahte baicca sáhttet leat eará bealit geavaheamis mat sáhttet leat váttisvuohtan, dadjá son.
Snapchat lea badjin listtus
Norggas geavahit sullii 90 proseantta buot nuorain sosiála mediaid, ja 37 proseantta sis dadjet ahte geavahit daid badjel golbma diimmu beaivvis, FHI dieđuid mielde.
Eanemusat geavahuvvon sosiála mediat gánddaid iskosis ledje YouTube (91 proseantta), Snapchat (91 proseantta), Instagram (84 proseantta) ja Tiktok (60 proseantta). Nieiddain ges Snapchat (97 proseantta), Instagram (96 proseantta), Tiktok (81 proseantta) ja Youtube (78 proseantta). (©NTB)
