Finnmárkkuopmodaga (FeFo) stivra lea juolludan 50 000 kruvnna Bugøyfjord Vel searvái vai sáhttet divvut Saviomuitobácci Bugøyfjord/Reaisavuonas Mátta-Várjagis.
– John Savio lea min stuorámus dáiddáriid searvvis. Mun lean nu ilus go mii beassat leat mielde doallat John Savio ja su dáidaga muittus boahttevaš buolvvaide, lohká FeFo stivrajođiheaddji Máret Guhttor, FeFo preassadieđáhusas.
Sámi dáiddár John Andreas Savio (1902 – 1938) lei eret Reaisavuonas Mátta-Várjjagis. Son barggai eanaš grafihkain ja málii govaid. Jagi 2016 juolludii FeFo 600 000 kruvnna vai Savio-čoakkáldat beassá fas ruoktot Finnmárkui.
Savio muitobázzi ceggejuvvui 2004:s Reaisavuonas. Guhttor rámida Bugøyfjord Vel searvvi go lea čorgegoahtán báikki ja álggahan muitobácci divvuma.
– Finnmárku dárbbaša áŋggirdeaddjiid geat áimmahuššet iežaset báikegotti ja min oktasaš historjjá. Mátta-Várjjaga gielda lea maid oassi sámi historjjás mii ánssáša bajideami. Dan dahká Bugøyfjord Vel searvvi dainna prošeavttain, lohká FeFo stivrajođiheaddji Máret Guhttor.
Prošeakta John Savio muitun
Olu jagiid lea dálki luskkiidahttán John A. Savio muitobázzi Reaisavuonas Mátta-Várjjagis. Bugøyfjord vel searvi ja Bugøyfjord bygde- og hyttelag searvi leat soahpan dán bácci ja guovllu divvunprošektii, maiddái olu eaktodáhtolaš bargguin. Ollislaš bušeahta lea 130 470 kruvnna ja Bugøyfjord Vel searvi lea ohcan ruđa sihke FeFos ja Mátta-Várjjaga gielddas, čálii Ságat aviisa gieskat.
