Sámedikkit ja Sámeráđđi almmuhit erenomáš vejolašvuođa nuoraide geain lea beroštupmi leat oahpahalli beakkán Walt Disney Animation Studiosas.
Sámedikkit Norggas, Suomas ja Ruoŧas, ja Sámeráđđi almmuhit odne juovlamánu 21. beaivve vejolašvuođa sámi nuoraide geat leat dáidda-, animašuvdna-, gráfalaš- dahje filbmasuorggi studeanttat dahje aitto gárven oahpu, fas ohcat beassat oahpahallin Walt Disney Animation Studiosas 2021:s. Oahpahalliprográmma bistá 12 vahku, dieđiha Sámediggi preassadieđáhusas.
Erenoamáš vejolašvuohta
Oahpahalli sámi guovllus galgá ohcat 10.000 $ sturrosaš mátkestipeandda, man Sámiráđđi ja Sámedikkit almmuhit dán oktavuođas.
– Mii leat nu ilus go dát erenoamáš vejolašvuohta fas rahpasa 2021:s, šattaš go digitála hámis dahje báikkálaččat Walt Disney Animation Studiosas, Los Angelesas. Diibmá ledje hui ollu buori ohccit Sámis, muhto covid-19 bissehii oahpahalliortnega dán jagi. Mii sávvat ahte sii geat ledje dalle ohcan, oidnet liibba fas ohcat dása. Mii leat ilus go mii sáhttit leat doarjjan duohtandahkat erenoamáš ja ávkkálaš oahppolonohallama, dadjet Aili Keskitalo (sámediggepresideanta Norgga bealde), Tuomas Aslak Juuso (sámediggepresideanta Suoma bealde), Per-Olof Nutti (sámediggepresideanta Ruoŧa bealde) ja Åsa Larsson-Blind (várrepresideanta Sámeráđis) oktasaš cealkámušas.
Ohcanáigemearri WDAS oahpahallin ja mátkestipendii lea ođđajagimánu 24. beaivve 2021.
