UiT Norgga árktalaš universitehta sávvá lagabui 8000 studentii bures boahtima ođđa skuvlajahkái dán čavčča.
Dál lea Samordna opptak almmuhan loguid mat muitalit man ollugat leat ohcan, ja ožžon fálaldaga skuvlasajiide allaskuvllaide ja universitehtaide Norggas.
Logut čájehit ahte UiT Norgga árktalaš universitehta fállá 7949 ođđa studentii skuvlasaji dán čavčča rájes. Lohku lea vehá unnit go 2021:s mii lei olahusjahki, go 8647 studentii fállojuvvui skuvlasadji UiT:s.
– Mii leat duhtavaččat dán jagi loguiguin ja illudit váldit vuostá ođđa studeanttaid. Mii sávvat ahte buohkat geat ožžot fálaldaga, váldet vejolašvuođa studeret min universitehtas, mii fállá alla fágalaš kvalitehta, olu erenoamáš ja gelddolaš vásáhusaid dáppe davvin, lohká UiT oahpahusa prorektor Kathrine Tveiterås preassadieđáhusas.
Profešuvdnaoahput geasuhit
Nu go juohke jagi, de lea váddáseamos beassat studeantan UiT profešuvdnaoahpuide, mat leat dat oahput mat eanemusat geasuhit riikkas.
– Dat lea kvalitehtamearka ahte leat nu ollu ohccit geain lea alla gelbbolašvuohta, geat sávvet beassat UiT:i vuosttažin, lohká Tveiterås.
