Dál sáhtát don váldit oktavuođa mánáid ja nuoraidpsykiatralaš klinihkain, SÁNÁG:in, Kárášjogas, Sámi klinihkain jus leat vuorjašuvvan korona (Covid-19) dili birra.
– Boahtte vahkku, vahkku 13 rájes fállat mii Skype bokte gulahallama koronavirusa birra mánáide ja nuoraide (ja váhnemiidda), muitala Sámi klinihka hoavda Amund Peder Teigmo.
– Dilli nu mo mis dál lea, lea rievdadan olusiid árgabeaivvi Norggas. Dál leat buot mánáidgárddit ja skuvllat gitta. Ođđasat mat gullojit, sáhttet vuorjat mánáid ja nuoraid. Lea ođđa árgabeaivi goas mii eat sáhte stoahkat nu mo ovdal, eatge mátkkoštit nu mo ovdal, eat leahkit bearrašiin seamma láhkai go ovdal. Mánáide ja nuoraide sáhttá dát leat issoras, ja olles olbmot sáhttet maid leat eahpesihkkarat mo sáhtášii mánáiguin buoremusat háleštit, lohká Sámi klinihka hoavda Amund Peder Teigmo preassadieđáhusas.
Danin fállá SÁNÁG rávvema ja bagadallama Skype ja telefovnna bokte, mánáide ja nuoraide vuollel 18 jagi – ja dasa lassin sin váhnemiidda. Sámi našuvnnalaš gealbobálvalus – psyhkalaš dearvvašvuođasuddjen ja gárrendilledikšu fállá rávvema ja bagadallama davvisámegillii ja dárogillii.
Fálaldat lea sámi álbmogii ja mánáide ja nuoraide Finnmárkku gielddain nu go Deatnu, Unjárga, Guovdageaidnu, Porsáŋgu, Gáŋgaviika, Davvesiida ja Kárášjohka go dat lea SÁNÁG ovddasvástidanguovlu.
– Min gávnnat telefovnnas 78 94 75 00 buot árgabeivviid gaskkal tiibmu 09.00 ja 14.00. Das maŋŋá oažžu áiggi goas sáhttá háleštit fágaolbmuin, ja sáhttá válljet háliida go gulahallat telefovnna dahje Skype bokte davvisámegillii dahje dárogillii. Dát fálaldat bistá gitta beassážiidda, vahku 15:s, lohká Sámi klinihka hoavda Amund Peder Teigmo gii lea gulahallanolmmoš.
Su gávdná telefuvnnanummaris 78 94 75 08 dahje nummar 918 39 178 dahje e-poasttas: Amund.Peder.Teigmo@finnmarkssykehuset.no
