Ođđajagimánus lágidii Sámi klinihka oahpahan- ja hálddašanguovddáš ADHD-kurssa váhnemiidda ja fuolaheddjiide.
– Buot oasseváldit ledje duhtavačča dahje hui duhtavačča, ja mii leat jo mearridan nuppi kurssa lágidit dán jagi, lohká oahppan- ja hálddašankoordináhtor Máret Rávná Boine, Finnmarkkubuohcceviesu neahttasiiddus.
Miehtá Norgga leat ásahuvvon oahppan- ja hálddašanguovddážat mat galget pasieanttaide ja oapmahaččaide doarjjan. Olbmuin lea riekti oažžut vuđolaš diehtojuohkima ja oahpu diagnosa, divššu ja rievdadusaid birra mat sáhttet eallimis dáhpáhuvvat.
Finnmarkkubuohcceviesu neahttasiiddus čállet ahte kursa manai hui bures ja ahte lei somá lágidit. Ledje lagabui 20 olbmo geat oassálaste kursii.
– Lea hui stuora beroštupmi dán kursii, máŋggas leat váldán oktavuođa ja čájehan beroštumi oassálastit boahttevaš kurssaide.
Kursafálaldat dárogillii
Sámi klinihka oahppan- ja hálddašanguovddážis lea ovddasvástádus sámi pasieanttain ja oapmahaččain. De geahččalit ge heivehit kurssaid sihke gielalaččat ja kultuvrralaččat.
ADHD-kursa šadde lágidit dárogillii, go oassálastit bohte miehtá Finnmárkku eaige buohkat hálddaš sámegiela.
– Mii leat árvvoštallan dán moatti jagi áigi ja dalle dadje váhnemat ahte háliidit kurssa dárogillii, go olu fágatearpmaid lea váttis áddet sámegillii ja dalle masset oasi kurssa sisdoalus, čilge Boine neahttasiiddus.
Muhto lasiha ahte dán fertejit árvvoštallat viidáset, ja boahtteáiggis soaitá kursa maiddái sámegillii
