Bálvalussuorggi bargit vásihit juovllaid áiggi eanemus seksuála loavkašuhttimiid. Fágasearvi Parat lea álggahan kampánjja eastadit seksuála loavkašuhttimiid.
– Jus barggat hotealla- ja restoráŋŋasuorggis, de lea dus viđa geardde stuorát riska vásihit seksuála loavkašuhttimiid go eará bargosajiin Norggas, lohká Parat fágasearvvi neavvu Ståle Botn preassadieđáhusas.
Eanemus riska lea bálvalussuorggis
Buohkain lea vuoigatvuohta oadjebas bargosadjái gos eai leat seksuála loavkašuhttimat, guorvumat. Dattetge vásihit njealje proseantta bargiin buot bargosurggiin guorvumiid bargosajis, čájeha Álbmotdearvvašvuođa instituhta 2022 iskan.
Nuorra nissonat vásihit dan eanemusat ja erenoamážit bálvalussuorggis gos 20 proseantta bargiin leat vásihan dan. Dát lea mealgat badjel gaskamearálaš logu. Parat lea kampanjja oktavuođas juohkán bargiide boaluid maidda lea čállon «Mun lean barggus» muittuhan dihte gussiide ahte eai unohasat láhtte. Botn muitala Fellesforbundet ja NHO lágidit iežaset kampánjjaid.
Bargoaddi ovddasvástádus
Parat deattuha ahte bálvalussuorggis ii galgga oktage dárbbašit vásihit amas olbmuid gieđaid su bađas, jienádemiid iežas fárdda ja olggosoaidnima birra, ii ge eará sávakeahtes seksuála fuomášumiid. Bargit ánssášit ahte guossit atnet sin árvvus. Botn muitala bálvalussuorggis leat olu nuorra bargit ja dán suorgái lea váttis háhkat bargiid, eai ge seksuála loavkašuhttimat gal buorit dili. Lea bargoaddi ovddasvástádus áimmahuššat ahte bargobiras lea oadjebas ja ahte bargi ii vásit seksuála loavkašuhttimiid.
– Kampánjjain háliida čalmmustahttit váttisvuođa ja dan eastadit. Bargoaddis lea sierra ovddasvástádus ovttasráđiid luohttámuš bargiin ja suodjalanbálvalusas bidjat eastadandoaimmaid johtui, lohká Parat nubbijođiheaddji Anneli Nyberg.
