Odne álgá «Kjendis-Farmen» ja Erlend Elias Bragstad lea okta gilvaleddjiin gii fárre sisa dološáigái oktan eará dovddus olbmuiguin.
Ođđajagemánu 1. beaivve álgá «Kjendis-Farmen», mii lea TV2 prográmmaráidu mas 12 dovddus olbmo galget birget seamma láhkai go olbmot čuođi jagi dassái birgejedje.
Sápmelaš Erlend Elias Bragstad (34) lea mielde Tv-ráiddus. Son lea dovddus olu prográmmain, earret eará «71 grader nord» ja «Skal vi danse».
Eará oassálastit
Earát geat leat mielde leat dáiddár Aune Sand (51), jumežat Johanne ja Kristine Thybo-Hansen (25) guhte leaba šaddan dovddus «Jegertvillingene» TV-ráiddus, realitynásti Stian Staysman Thorbjørnsen (35), modealla Maiken Wahlstrøm Nilssen (26), giehtaspábbanásti Frank Løke (37), neavttár Lene Elise Bergum (45), Newton-prográmmajođiheaddji Stian Sandø, Inga Berit Lein (36), gii lei mielde «Jakten på kjærligheten» ráiddus 2004:s, Youtube-násti Dennis Vareide (27) ja čuoigi Martine Ek Hagen (26).