-Almmuhus-
OĐĐASAT– Tiril duođaid ánssášii vuoitit

– Tiril duođaid ánssášii vuoitit

-

-

Ronald Isaksen Pulk muitala iežas Farmena vásáhusaid birra. – Doppe lei ollu bargu ja olmmoš beasai guoirat ollu, boagusta son.

Guhtta vahkku lei Ronald Pulk mielde Farmenis mii filbmejuvvui Li-gård nammasaš dálus mii lea Tangenis lahka Mjøsa jávrri. 

– Farmen lei hui somás vásáhus munnje. Doppe lei ollu bargu ja olmmoš beasai guoirat ollu. Lea measta nu ahte olmmoš galggašii juohke geasi váldit dakkár Farmen sullasaš hoiddu, boagusta Ronald ja muitala mii lei losimus Farmenis:

– Losimus lei áibbašeapmi dábálaš eallimii. Jurdilin gal muhtu­min manne son mun dása lean searvan. Fertejin ollu bargat mentálalaččat. Muhto go de golihii moadde diimmu, de lei vajál­duvvan fas.

 

Lossa beaivvit

Son muitala garra beivviid birra go ii lean báljo borramuš, muhto garra fysalaš barggut.

Dáhpáhuvai ahte oasseváldit nohkkojedje ­birgui ovdal go márkanbeaivi fas bođii ja nu sii šadde dušše gazzat buvrru ja buđehiid borrat. 

– Mii leimmet lihkus čeahpit vurkkodit liema, nu ahte eai lean dušše buđehat.

Ronald muitala maid son muitá buoremusat iežas áiggis Farmenis: 

– Buot buoremusat muittán dan go mii galggaimet ovttas doaimmahit ja hoidet dállodoalu ja ­ledje aivve amas olbmot. Mis buorránii ovttasbargu beaivvis beaivái ja loahpaloahpas mii leimmet dego bearaš. Mu mielas lei maid hirbmat suohtas fas bargat elliiguin, dan in lean bargan dan rájes go fárrejin Kárášjohkii 2000:s, dadjá Ronald. 

 

– Oba buoidi

Ronald muitala iežas measta suorga­nan go oinnii vuosttaš Farmen-­sáddaga.

– Go oidnen iežan TV:s vuosttaš Farmen-sáddagis, de gal ledjen oba buoidi. Dál maŋŋel Farmena lean geahččalan lášmmohallat ja doalahit iežan seamma lášmadin go dalle go Farmena filbmen nogai. Mun lean geahččalan doala­hit ahte in galgga buoidut badjelmeare, boagusta Ronald. 

Ronald muitala ahte sis lei buohkain hui buorre bargomokta ja ahte buohkat háliidedje lihkos­tuvvat vahkkobargguin.

Nu sus ii oba lean ge miella gomihit vahkko­bargguid vai earát eai oaččo finála­niibbi ja ruđa mainna márkanis besset gávppašit. 

– Mun in háliidan billistit ovttage ovddas, go mis lei nu buorre oktavuohta olles joavkkus, muitala Ronald. 

 

Feastamállásat

Riikamediain beakkehii ahte Farmena oasseváldit leat diŋgon Peppes pizza ja eará herskkuid Farmenii nuppi filbmenvahkkus jo.

Dan birra muitala Ronald ahte son ii háliidan searvat dieidda mállásiidda go son lei jo searvan Farmenii dan nammii ahte háliidii geahččalit eallit nu go čuođi jagi áigi dahke in ge háliidan rihk­kut njuolggadusaid. 

– Oažžu lohkat sii ledje dego mánát geat vurde juovlaruohta go muhtin evttohii diŋgot borra­muša, ja orui leamen hui álki buohkaid oažžut searvat go gulle pizza. Sii vižže pizzaid, Kvikk lunsj šukoládiid ja Pepsi max bruvssaid, ja sii herskkostalle guokte beaivvi. Mun dadjen čielgasit ahte in hálit searvat mállásiidda vaikko geahčča­ledje oalgguhit mu. Mannen oađđenlatnjii go sii rogge borra­mušaid bajás, muitala Ronald ja joatká: 

– Sii bohte latnjii geahččalit ­fillet mu pizzain ja šukoádiin, muhto mun in háliidan seahkánit dieidda feastamállásiidda.

 

 

Buorre oktavuohta

TV:s mii leat oaidnán ahte Ronald oaččui buori oktavuođa Svein Østvikain.

Ronald muitala ahte Svein lea hirbmat buorre olmmoš geainna lea álki humadit. 

– Moai šattaime measta buoremus olbmážat doppe Farmenis. Munnos lei hui buorre gulahallan gitta álggu rájes go son liiko leaik­kastallat ja dan dagan mun ge. Muhto Sveiniin gal sáhtii hupmat duođalaš áššiid maid, ii ge dušše bieđđat. Mu mielas lei hirbmat dehálaš gávdnat doppe buori olbmá geainna humada ja geasa jurdagiid bessen suođđat. Liikojin ságastallat Sveiniin, muitala Ronald.

Son muitala maid ožžon hui buori oktavuođa Tiril Sjåstad Christianseniin ja Kathrine Sørlandain.

Soai leigga maid buorit humadanolbmát Ronaldis Farmenis.

– Muđui ledje vel Ole Klemetsen, Erik Anders Sæter, Trude Mostue, Johanna Grønneberg Mesa ja Alex Rosén dakkárat geaiguin oahpásnuvven bures. Earáide in ollen oahpásnuvvat nu bures, dadjá Ronald. 

 

Rámida vuoiti

Ávvir jearrala Ronaldis ahte go son ii vuoitán Farmena, lei go Tiril Sjåstad Christiansen rievttes vuoiti?

– Juo, Tiril duođaid ánssášii vuoitit. Son lea hirbmat barggánis ja čeahpes nieida, dadjá Ronald. 

Ronald muitala iežas lohkan čuoggáid finálas ja gávnnaha ahte son livččii hui dássálaga leamaš Sjåstad Christianseniin, go Ronald gal máhtii measta buot bargguid ja gažaldagaid finálas. 

– In buot gal dieđus máhttán. Go čuvvon finála, de lei goit okta dakkár bargobihttá man in lean áibbas sihkar movt livččen galgan čoavdit, go mun in lean bargan vahkkobarggus dakkár bargguid. Muhto mun jáhkán gal ahte livččen oba gazzalaga leamaš Tiriliin ja leimme soaitit áibbas dássálaga. Muhto die ii leat eará go jeđđehus dál maŋit áigái, dadjá Ronald. 

 

Oahppan ollu

Ronald muitala ahte Farmenis ledje ollu ođđa barggut maid son ii leat bargan ovdal.

Son namuha snihkkenbarggu ovdamearkan man ii leat báljo goasse bargan ovdal. 

– Galggašii gal jáhkkit ahte guovdageaidnulaš lea snihkken, muhto mun in leat báljo goassege dan bargan, dat gal lei ođas munnje. Mun lean maid beassan oahppat veltet gietti nu go čuođi jagi áigi barge. Vaikko das gal ii leat šat ávki dán áigge, de dat lei goit ođđa oahppu munnje. Mun ohppen maid ollu elliid birra, nu go heasttaid ja earenoamážit spiinniid birra, daid maid in leat báljo oaidnán ge ovdal, boagusta Ronald.

-Almmuhus-