Maŋŋel go nisu 20-jagin jámii rabiesdávddas giđđat, leat eambbosat váldán rabiesboahku. Dán jagi leat dássážii vuovdán eanet rabiesvaksiinna go olles 2018:s, čállá NRK.
Diibmá vuvdojuvvojedje 13 680 dosa, ja dán jahkebealis leat fas jo vuvdon 14 394 dosa, Farmastat dieđuid mielde.
Miessemánus jámii Birgitte Kallestad Førde buohcceviesus maŋŋel go gáskkáhalai vielpái Filippinenes.
Kallestad buohccái oanehis áiggi maŋŋel go lei ruoktot ollen.
Dát várálaš virusdávda sáhttá njoammut rumašgolgosa mielde, mii dábálaččat lea liigeváikkuhus go gáskkáhalla.
Nissonis ii lean rabiesvaksiidna.
Olbmot leat diđolaččat
– Mii ain oažžut eanet čujuhusaid go ovdal, sihke ovdal ja maŋŋel mátkki. Rabies lea dávda masa gávdno buorre dikšu jus álgá divššuin dakka maŋŋel go lea buohccán, nu ahte lea positiivvalaš ahte olbmot leat diđolaččat, dadjá doavttir Niemi Eide Folkehelseinstituttet:s NRKi.
Birgitte Kallestad Førde jápmima birra lei olu fuomášupmi, ja oanehis áiggi maŋŋel dieđihedje mátkeklinihkat ahte eambbosat go ovdal ledje váldán oktavuođa vaksiinna dihte.
Dan ain dahket olbmot, Reiseklinikkena doaktára Gunnar Halse dieđuid mielde.
Son muitala ahte sis leat mánnosaččat sullii 15 čujuhusa rabiesa birra.
(©NTB)
