Badjel bealli joatkkaskuvlla ohccin leat válljen fidnofága vuosttaš sávaldahkan. Sin searvvis leat dál eambbo nieiddat geat válljejit elektro- ja dihtorteknologiija ja teknologiija- ja industriijafága go ovdal. Dan čájehit ohcciidlogut joatkkaskuvllaide 2023-2024.
– Nuorat čuvvot eanas árbevirolaš sohkabealminstara go ohcet joatkkaskuvllaide. Daid maŋemus jagiid oaidnit mii baicce ahte eambbo nieiddat válljejit dakkár fágaid main leat leamaš eanas bártnit, dadjá Irene Hilleren, Oahpahusdirektoráhta statistihkka ja dihtorhálddašan ossodatjođiheaddji preassadieđáhusas.
Čoavddalogut dán jagáš ohciidstatistihkkii
– Eambbo nieiddat ohcet daid árbevirolaš «bárdneoahppoprográmmaide» go ovdal
– 51 % ohcciin lea fidnofága oahppoprográmma vuosttaš sávaldahkan
– Ohccit fidnofágaide leat lassánan daid maŋemus jagiid olu fylkkain. Oslos fas lea ovdáneapmi mannan áibbas nuppeguvlui, gos ii leat eará 25 % geat ohcet fidnofágaide
– Dearvvašvuođa- ja bajasšaddanfága ohcciin lea stuorámus njiedjan, sihke skuvllaide ja oahpposajiide. Leat 1 700 unnit ohcci vg1 buohtastahttojuvvon 2020:in
Stuora regionála erohusat
Logut čájehit ahte eambbo nieiddat válljejit elektro- ja dihtorteknologiija go ovdal, teknologiija- ja industriijafágaid lassin.
Ohcciidlogut fidnofágaide leat obbalaččat lassánan daid maŋemus jagiid máŋgga fylkkas.
– Logut geat ohcet fidnofágaide leat eanemus lassánan Romssas ja Finnmárkkus, seammás go Oslos manna nuppeguvlui, dadjá Hilleren.
Møre ja Romsdalas, Nordlánddas ja Romsa ja Finnmárkkus ohcet birrasii 60 % nuorain fidnofágalaš oahppoprográmmii vg1. Oslos dušše 25 %.
