Eallin lea girjái ja olmmoš lea maid mohkkái ja girjái. Odne lea suhtu, ihttin fas mokta. Nu maiddái dávviriid ektui.
Eallin lea girjái ja olmmoš lea maid mohkkái ja girjái. Odne lea suhtu, ihttin fas mokta. Nu maiddái dávviriid ektui.
Mun lean Ávvira journalista ja govvejeaddji. Muhto maiddái mun lean nu mo don, son dahje mii – duollet dalle lean gávppašeaddji. Muhtumin lean hui, hui čeahpes gávppašeaddji, muhtumin lean fas viehká čuorbi gávppašit. Ieš alddis in áigon gávppašeami birra muitalit. Muhto dan birra man ožžon goit gávppašeami bokte.
Dán juoga birra in leat goassige ovdal jurddašan nu ollu go daid maŋimuš áiggiid. In dieđe mii dása lea váikkuhan lei go dat ahte dát juoga varra dan áiggi lea gávdnamis dán beal ráji ollu viesuin. Muhto dat ii lean goit munnje áibbas dábálaš. Vai lea go dása váikkuhan iežan láikkesvuohta?
Vissa goappašat bealit leaba váikkuhan dasa ahte loahpas mearridin dál de, dál de mun ge oastán dán mii dutnje soaitá leat áibbas dábálaš ja lunddolaš. Muhto ii fal munnje. Danin bájilčála lea ná: Eallin ovdal ja maŋŋel.
Illudan go mun? Dál go mus lea dát juoga dieđus vástidan iežan ge jeraldahkii: – Jua, mun illudan ja návddašan! Sáhtán ge vel lasihit dan ahte dán juoga ledjen berret oastit ollu jagiid ovdal go dál. Movt mun muđui birgejin dán haga nie ollu jagiid? Movt dat lei vejolaš ge? Gal mun ledjen gusto oalle “čáffadis boja” go nie ollu jagiid birgejin dán juoga haga!
Ovddit beaivvi jearai olmmái mus:
– Na movt lea dus dát, doaibmá go?
Vástidin:
– Jua, doaibmá bures!
Maid barggat dainna, jearáhii son.
– Na humadan dainna. Measta sávkalan ja rámidan dán dieđus! Man buorre dat lea!
Olmmái mojahalai.
In áiggo “givssidit” šat du. Danin dajan mii lea dát juoga mainna lean dain maŋimuš vahkuin leamaš nu duhtávaš ja jo rámidan ollu. Dat juoga ii leat eará go lihttebassanmášiidna. Amma boagustat?
Nu dat lea eallin ovdal lihttebassanmašiinna ja maŋŋel. Eallin rievdá oallat. Ja rievdá ge buorit guvlui. Mu oainnu mielde dat lea goit nu. Lean go mun dán dáfus seammá lágan go don? Soaittan. Muhto mun lean mun, ja don leat fas don. Mun lean Ávvira journalista, ja don soaittat leat čeahpes oahpaheaddji dahje gii nu eará gii loavttát áiggi doppe gos don leat dál.
Juohke lávvardaga almmuhat mii «Lávvardatságaid», háliidat go don čállit koseriija dahje hearvásčállosa vaikke man birra? Sáddes čállosa midjiide redaksjonen@avvir.no e-poastačujuhussii.
