– Dál oaidnit ahte ábuhii ražastit háhkat eanet eaktodáhtalaš bargiid, bargu lea buktán bohtosiid, lohká Frivillighet Norge -searvvi váldočálli, Stian Slotterøy Johnsen.
Olu searvvit vásihedje ahte sin eaktodáhtolaš veahkit jávke pandemiijaáigodagas ja lei váttis oažžut sin fas boahtit. Olusat jurddašedje jávket go eaktodáhtolaš veahkit oalát. Frivillighet Norge maŋimuš iskkus čájeha dál máhccet fas olbmot.
Frivillighetsbarometer čájeha ahte 62 proseantta olbmuin muitaledje sii leat bargan eaktodáhtolaš barggu. Seamma lágan iskkus jagi 2019 vástidedje 63 proseantta jerron olbmuin ahte sii veahkehit servviid.
– Eaktodáhtolaččat veahkehit servviid ja dat lea buorre sihke ovttaskas olbmuide ja servodahkii ja danin lea hui movttiidahtti go olbmot fas servet, lohká váldočálli Slotterøy Johnsen preassadieđáhusas.
Jagi 2023 Frivillighetsbarometer almmuhuvvo borgemánu 30. beaivvi Oslos. Dalle oaidnit man olu eaktodáhtolaš bargu mearkkaša sihke demokratiijai, gildii ja man olu dat oassálastin mearkkaša mánáide ja nuoraide beassat servviide oassálastit.
