Dušše golmmas 100 medisiidnastudeanttas ja easkaoahppan doaktáris jáhkket ahte bargagohtet fástadoavttirin.
Vaikke olu norgalaččain váilu fástadoavttir, de eai loga boahtteáiggi doaktárat háliidit bargat dan virggis.
Dušše golmmas 100 medisiidnastuđeanttas ja easkaoahppan doaktáris vástidit ahte árvvoštallet álgit fástadoavttirin, dieđiha TV2. Dat vuorjašuhttá Dearvvašvuođadirektoráhta direktevrra Bjørn Guldvog.
– Dušše golbma proseantta árvvoštallet álgit fástadoavttirin, ja dat lea oba unna oasáš boahtteáiggi doaktáriin, lohká son.
Ii leat sadji ođđa pasieanttaide
100 gielddas eai leat fástadoaktáriin šat sajit ođđa pasieanttaide.
– Dat mearkkaša ahte olbmot geat fárrejit daid gielddaide eai oaččo doaktára ja olbmot geat ásset daid gielddain ges eai beasa molsut doaktára, lohká Dearvvašvuođadirektoráhta guorahallan- ja servodatjuhkosa direktevra Helen Brandstorp.
Dál vurdet dearvvašvuođasuorggi aktevrrat ja dearvvašvuođaministtar ásaha doaibmabijuid vai dilli buorránivččii.
Vuoruhuvvo
– Jahkebeali geahčen dáidit massán čuohtenáre ođđa fástadoaktára ja máŋga duháha pasieantta eai oba oaččo ge de fástadoaktára, lohká Nasjonalt senter for distriktsmedisin jođiheaddji Anette Fosse.
Duorastaga lágiduvvui fástadoavtterkonferánsa Oslos. Dearvvašvuođaministtar Ingvild Kjerkol (Bb) oassálasttii ja deattuhii ahte vuoruhit dán hástalusa. Son bivdá gierdevašvuođa ja dieđiha ahte áigot čađahit struktuvrralaš rievdademiid.
(©NTB)
